Озарбайжон миллий гилам музейи коллекцияси яна бир ноёб санъат асари билан бойиди. Берлинда яшовчи Озарбайжон адабий-маданий “Ишиғ йўл” жамоаси аъзоси, коллекционер Ҳожат Абасий 1825 йил Шушада тўқилган “Ачма-Юмма” номли Қорабоғ гиламини мажмуага совға қилди.

“АзерТАЖ” ёзишича, гилам ўртаси ва чети геометрик ҳамда гулли нақш, такрорланмас тасвир билан безатилган.

Ҳожат Абасий 199 йиллик нафис асарни ватанида кўргазмага қўйишдек орзуси рўёбга чиққанидан мамнунлигини билдирди.

Муассаса директори Амина Меликова бу эзгу ташаббус – нодир ҳунармандлик намунаси ҳадя қилингани учун коллекционерга миннатдорлик билдирди. Мутахассис фикрича, ажойиб композицияси, ранг уйғунлиги ва безак бойлиги билан ажралиб турадиган “Ачма-Юмма” музейнинг Шушадаги филиали кўргазмасидан муносиб ўрин эгаллайди.