“Ўзагросуғурта” АЖнинг Хоразм вилоятидаги филиалида “Суғурта хизматларини сотишда маркетингни роли” мавзусида семинар бўлди.

Тадбирда видеоконференцалоқа орқали Бошқарув мутахассислари ҳамда ҳудудий филиаллар масъул ходимлари иштирок этди.

Семинарда Урганч давлат университети доценти, иқтисодиёт фанлари фалсафа доктори (PhD) Дилфуза Матёқубова маъруза қилди.

Таъкидланганидек, суғурта бозорига чуқур кириб бориш, мижозларнинг эътиборини жалб қилишда маркетинг хизматини ривожлантириш ҳар қандай компания фаолиятининг муҳим йўналишига айланмоғи керак. Маркетинг шунчаки суғурта компаниясининг рекламасини ташкил этувчи хизмат эмас, балки мижозлар билан муносабатларни бошқариш стратегиясига эга бўлсагина кутилаётган натижага эришиш мумкин. Шу боис, бугун бозорда ўз ўрнини топишга интилаётган ҳар бир компания маркетинг хизматини ривожлантиришга алоҳида эътибор қаратмоқда.

Маърузачи тадбир давомида маркетингнинг асосий тамойиллари, бозор конъюнктурасини шакллантирувчи омиллар, истиқболдаги ривожланиш кўрсаткичлари ҳамда баҳолаш услублари ҳақида батафсил гапириб берди. 

Эслатиб ўтамиз, “Ўзагросуғурта” АЖ ҳудудларда фаолият юритаётган олимларнинг илмий таклифларини соҳага татбиқ этишга қаратилган семинарлар ташкил этиб бормоқда.

ЎзА