“9-декабрь – Халқаро коррупцияга қарши кураш куни” муносабати билан “Ўзагросуғурта” АЖда “Аксилкоррупция ойлиги” доирасида “Очиқ эшиклар куни” ташкил этилди. Тадбирда республика ва вилоят раҳбар-ходимлари, Тошкент шаҳар суди иқтисодий ишлар бўйича судлов ҳайъати судьялари иштирок этди. Эътиборлиси мазкур учрашув онлайн тизим орқали барча вилоятларга намойиш қилинди.

Сўзга чиққанлар коррупциянинг давлат ва жамият тараққиётига энг жиддий путур етказадиган иллатлардан бири эканлигини, унга қарши кураш нафақат давлат органлари балки ҳар бир фуқаро олдидаги муҳим вазифа эканлигини таъкидлашди.  

Айтиш керакки, “Ўзагросуғурта” АЖ тизимида ҳам ходимларда коррупцияга нисбатан муросасиз муносабатни кучайтириш бўйича мунтазам равишда турли тадбирлар, соҳа вакиллари билан учрашувлар ўтказиб келинмоқда. Ўтган давр мобайнида ўндан ортиқ семинар ва давра суҳбатлари ташкил этилди.  

“Очиқ эшиклар куни” ходимларнинг ҳуқуқий онг ва маданиятини юксалтириш, коррупциянинг олдини олиш бўйича билим ва кўникмаларини мустаҳкамлаш, энг муҳими, уларда иллатга нисбатан қатъий тоқатсизлик кайфиятини шакллантиришни  мақсад қилган. Шу боис Тошкент шаҳар суди иқтисодий ишлар бўйича судлов ҳайъати судьялари таклиф этилиб, улар ўзларининг тажрибаларида, ёрқин мисоллар орқали коррупцияга қарши кураш борасида кўрилаётган чора-тадбирлар ҳақида батафсил маълумот беришди.  

Тадбир якунида мавзу доирасида фикр-мулоҳазалар алмашинилди ҳамда иштирокчиларни қизиқтирган саволларга батафсил жавоблар қайтарилди.  

<iframe width="560" height="315" src="https://www.youtube.com/embed/hUs8oumlBQA?si=nNsBF4fZ2Wih9G2v" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Нишонбой Абдувойитов, Улуғбек Тўхтаев, ЎзА