Оңтүстік Корея Статистика Бюросының мәліметі бойынша, туудың жалпы коэффициенті — әйелдің өмір бойы дүниеге әкелетін орташа бала саны — 2023 жылы 0,72 болған.

Салыстыру үшін бұл коэффициент 2022 жылы 0,78, 2021 жылы 0,81, 2020 жылы 0,84 болды.

Сарапшылардың есептеуінше, егер бұл төмен туу көрсеткіші жалғаса берсе, 2100 жылға қарай Азиядағы бесінші экономикасы саналатын Оңтүстік Корея халқының саны екі есеге жуық азайып, 26,8 миллион адамды құрайды.

2006 жылдан бері ел үкіметі төмен туу мәселесін шешуге шамамен 270 миллиард доллар бөлді, бірақ бұл шаралар нәтиже бермеді. Ынталандыруларға ерлі-зайыптыларға қаржылық субсидиялар, бала күтімі қызметтері және бедеулікті емдеуге қолдау қарастырылған.

The Guardian дерегінше, ерлі-зайыптылар көп балалы отбасын құрудағы кедергілер ретінде бала тәрбиесіне кететін шығындар мен мүлік бағасының өсуін, жақсы жалақы алатын жұмыстардың жоқтығын және білім беру жүйесіндегі бәсекелестікті айтқан.