Оңтүстік Кореяның әскерилері екі Кореяны бөліп тұрған қарусыздандырылған аймақтағы қауіпсіздік бекетін қалпына келтіру мүмкіндігін қарастыруда.

Ренхап агенттігінің хабарлауынша, 1950-53 жылдардағы Корей соғысынан кейін құрылған алғашқы күзет бекеттерінің бірі Оңтүстік Кореяның әрекеті аясында қалпына келтірілуі мүмкін. Бұған дейін КХДР ортақ шекара бойындағы қауіпсіздік бекеттерін қалпына келтірген болатын.

«Басқа қираған 10 күзет бекетімен салыстырғанда, Косон бекетін қалпына келтіру салыстырмалы түрде оңай, өйткені нысан әлі бұзылмаған. Оның үстіне нысан стратегиялық маңызды аймақта орналасқан», - делінген агенттік хабарында.

Дереккөз мәліметінше, Оңтүстік Корея тарапы Солтүстік Кореяның қарусыздандырылған аймаққа әскері мен қару-жарағын қайта орналастыруына жауап ретінде уақытша бақылау бекеттері мен қару-жарақтарды да дайындап жатыр.