Оңтүстік Кореядағы саяси дағдарыс желтоқсан айының басында президент Юн Сок Ёльдің күтпеген жерден әскери жағдай жариялауынан кейін күшейді.

Әскери жағдай барлық саяси қызметті, соның ішінде парламент пен саяси партиялардың жұмысын тоқтатуды білдіреді.

Әскери жағдай жарияланғаннан кейін бірден 190 депутат парламентке кіріп, президенттің шешімін бұғаттауға қол жеткізді. Президент әскери жағдай енгізілгеннен алты сағат өткен соң оны жоюға мәжбүр болды.

Енді не болады?

Енді барлығы Конституциялық соттың шешіміне байланысты. Дәл осы сот импичментті растау немесе Юн Сок Ёльді қызметіне қайтару туралы шешім қабылдауы тиіс. Істі қарау алты айға дейін жалғасуы мүмкін.

Оңтүстік Кореяның премьер-министрі Хан Деок Су сот барысында президент міндетін атқаратын болады.

Қазіргі уақытта елдің бұрынғы қорғаныс министрінен басқа, президент Юн Сок Ёль мен өзгелер де мемлекетке опасыздық жасау және билікті асыра пайдалану айыптарымен тергелуде. Тергеу аясында мемлекет басшысына елден шығуға тыйым салынған.