Бугун “Ўзкимёсаноат” АЖда ўтказилган брифинг мазкур ташкилот ва унинг таркибига кирувчи корхоналарда 2025 йил 9 ойи давомида коррупцияга қарши курашиш соҳасида амалга оширилган ишлар сарҳисобига бағишланди.

Унда жамият ахборот хизмати раҳбари Ҳожиакбар Тўлагановнинг маълум қилишича, “Ўзкимёсаноат” АЖ ҳамда тармоқ корхоналарининг Коррупцияга қарши курашиш ва комплаенс назорати бўлинмалари томонидан амалга оширилган чора-тадбирлар амалдаги қонунчилик ва ички норматив-ҳуқуқий ҳужжатлар талабларига мувофиқ ташкил этилган.

Комплаенс назорати ҳамда коррупциянинг олдини олишга қаратилган тадбирлар “Ўзкимёсаноат” АЖнинг ижро аппарати, шунингдек “Максам-Чирчиқ” АЖ, “Аммофос-Максам” АЖ, “Ўзкимёсаноатлойиҳа” АЖ ва “Ўзкимёимпекс” МЧЖда амалга оширилди. Шу даврда “Ўзкимёсаноат” АЖ ва унга қарашли корхоналарга ишга қабул қилинган 260 нафар янги ходим манфаатлар тўқнашувининг олдини олиш мақсадида текширувдан ўтказилди.

–Бундан ташқари, 97 нафар раҳбар ходим ва коррупцияга қарши ички тузилмалар мутахассисларининг малакаси оширилди. Жумладан, 67 нафар раҳбар ходим ISO 31000:2018 - “Хавфларни бошқариш” халқаро стандарти бўйича ўқув курсларини тамомлади. 30 нафар коррупцияга қарши ички тузилма ходими “Коррупцияга қарши виртуал академия” портали орқали “Коррупцияга қарши курашиш менежмент тизимининг самарали ишлашини таъминлаш” мавзусидаги чуқурлаштирилган курсларда ўз малакаларини оширди. Корхоналарда коррупцияга қарши ички назорат тузилмалари томонидан 18 дан ортиқ семинар ва давра суҳбатлари ташкил этилиб, уларда 820 нафардан зиёд ходимга коррупцияга қарши курашиш ва манфаатлар тўқнашувининг олдини олиш масалалари бўйича назарий билимлар берилди, –деди Ҳ.Тўлаганов.

Қайд этилгани каби Ўзбекистон Республикаси Президентининг 2022 йил 12 январдаги “Коррупцияга қарши курашиш ишларининг самарадорлигини рейтинг баҳолаш тизимини жорий этиш чора-тадбирлари тўғрисида”ги қарорига мувофиқ, жорий йилнинг ўтган тўққиз ойи давомида амалга оширилган ишлар бўйича маълумотлар “E-Antikor.uz” электрон платформасига 5 та йўналиш ва 29 та махсус индикатор бўйича юкланди.

Шунингдек, 2025 йил июль ва август ойларида “Максам-Чирчиқ” АЖ ҳамда “Ўзкимёимпекс” МЧЖ халқаро “CERT International” академияси томонидан ўтказилган аудитдан муваффақиятли ўтиб, коррупцияга қарши курашиш соҳасидаги нуфузли ISO 37001:2016 халқаро сертификатига қайта муносиб деб топилди.

Ҳожиакбар Тўлаганов таъкидлаб ўтганидек, давлат харидлари доирасида ҳисобот даврида 2 минг 518 та хўжалик шартномаси тузилиб, барчасига коррупцияга қарши курашиш талаблари киритилган. Ўтган даврда  ташкилотга жисмоний ва юридик шахслардан 380 та мурожаат келиб тушган. Унинг  12 таси коррупцияга оид бўлиб, барчаси бўйича хизмат текширувлари ўтказилди. Натижада 10 нафар ходимга нисбатан интизомий чоралар кўрилган.

Шу билан бирга, тизимда ўтказилган 56 та режали текширув натижасида 25 та ҳолат юзасидан тўпланган материаллар ҳуқуқий баҳо бериш учун ҳуқуқни муҳофаза қилувчи органларга юборилган. Айни пайтда 20 та ҳолат бўйича жиноят иши қўзғатилган. 5 та ҳолат юзасидан эса тергов ҳаракатлари олиб борилмоқда. 

Н.Зиёдуллаева, ЎзА