Осиё тараққиёт банки матбуот хизмати хабар беришича, ОТБ ва "Саноатқурилишбанк" Ўзбекистонда давлат банкларини хусусийлаштиришни қўллаб-қувватлаш учун 50 миллион АҚШ доллари миқдорида шакли ўзгартирилиши мумкин бўлган биринчи навбатда қаноатлантириладиган қарз имзолади.

Мазкур қарз банк секторини мустаҳкамлашга ва иқтисодий ривожланишга ёрдам беришга қаратилган. Халқаро молия корпорацияси (ХМК) ва Европа тикланиш ва тараққиёт банки (ЙТТБ) параллел кредиторлар сифатида иштирок этмоқда. 

Бу маблағлар "Саноатқурилишбанк"га етарли даражада хизмат кўрсатилмаётган микро, кичик ва ўрта корхоналарни, шу жумладан, аёлларга тегишли бўлган ва раҳбарлик қилинадиган корхоналарни молиялаштиришни кенгайтиришга кўмаклашиш учун ишлатилади. 

Портфелни диверсификация қилиш "Саноатқурилишбанк"ни мижозларнинг кенг қатламига хизмат кўрсатувчи тўлиқ универсал тижорат банкига айлантиришга ёрдам беради. ОТБ, шунингдек, "Саноатқурилишбанк"нинг трансформация бўйича йўл харитасини амалга оширишда ёрдам бериш учун техник кўмак тақдим этади. 

ОТБнинг Хусусий сектор операциялари департаменти Бош директори Сюзан Габурининг қайд этишича, ОТБ Ўзбекистон Ҳукуматини унинг динамик ва инклюзив бозор иқтисодиётига ўтиши ва банк сектори ислоҳотларини амалга оширишда ҳар томонлама қўллаб-қувватлайди. 

Мазкур лойиҳа мамлакат банк тизимининг стабиллигини, капиталлашув ва депозитлар даражасини қўллаб-қувватлайди. Ушбу лойиҳа шунга ўхшаш ислоҳотларни амалга оширмоқчи бўлган минтақадаги бошқа мамлакатлар учун кучли иқтисодий асослантирув бўлиб хизмат қилади. 

Ш.Маматуропова, ЎзА