Ўтган йилги халқаро мусобақалар сарҳисобига кўра, от спортининг конкур йўналиши бўйича жаҳон кубоги йўлланмасини қўлга киритган маҳоратли чавандозимиз куни кеча Бирлашган Араб Амирликларида ташкил этилган Гран-при турнирида муваффақиятга эришди.

БААнинг Абу-Даби шаҳрида от спортининг конкур йўналиши бўйича CSI 5* таснифидаги нуфузли мусобақада терма жамоамиз аъзоси Бекзод Қурбонов “Santos Hippica” лақабли тулпорда иккинчи натижани қайд этди ва кумуш медалга сазовор бўлди.

Ушбу натижа дунёнинг энг маҳоратли чавандозлари билан кечган рақобатда ўз истеъдодини намойиш этган Б.Қурбоновнинг жорий йилнинг 8-12 апрель кунлари от спортининг конкур йўналиши бўйича АҚШнинг Техас штатида ўтадиган жаҳон кубогига муносиб ҳозирланаётганидан далолат, дейиш мумкин.

Т.Рўзиев,

ЎзА