Шанба куни ярим тунда содир бўлган сув тошқини Техас аҳолиси, дам олувчилар ва расмийларни саросимага солди. Қутқарувчилар вайрон бўлган қирғоқ бўйлаб йўқолганларни қидирмоқда. CNN тарқатган маълумотларга кўра ҳалок бўлганлар сони 80 дан ортган, йўқолганларнинг 28 нафари болалардир. Гваделупе дарёси ўтган жума куни атиги 45 дақиқада 8 метр кўтарилган. Уйлар, дам олиш масканлари, хуллас яқин атроф бутунлай ўпирилган.

Аҳоли кучли ёмғир натижасида юзага келган табиий офат яна давом этиши мумкинлигидан огоҳлантирилган. Қидирув-қутқарув ишлари фаоллашган: вертолёт, қайиқ ва учувчисиз учоқлар омон қолганларни қутқариш, йўқолганларни топиш учун сафарбар қилинган. Президент Трамп ҳам жабр кўрганларга ёрдам берилишини айтган.

Штат губернатори Грег Эбботт “Бедараклар йўқолганларнинг ҳаммасини топамиз”, дея одамларни тинчлантиришга уринган. Округ шерифи Хилл Кантри ўз ҳудудидан 32 кишининг ўлимини тасдиқлади: шундан 14 нафари болалар.

Тревис ва Бернет округларида ҳам ўлим ҳолатлари қайд этилган. Халқ орасида жиддий савол пайдо бўлган: Мунтазам ва кучли сув тошқини билан танилган ҳудудда аҳоли тегишли тарзда огоҳлантирилганми ёки йўқ?

Расмийлар одатий бир ойлик миқдорга тенг ёмғир ёғилишини кутилмаганини айтиб, ҳукуматни ҳимоя қиляпти.

Техас марказидаги Гваделупе дарёси бўйидаги тепаликлар, айниқса, июль ойида дам олувчи ёшлар билан тўлади. Шу боис йўқолганлар сонини аниқлаш жуда қийин кечяпти.

<iframe width="650" height="420" src="https://www.youtube.com/embed/VWbkRu-NAkc" title="O‘t balosidan, suv balosidan ..." frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Улуғбек Тўхтаев, ЎзА