Ichki ishlar vazirligi Malaka oshirish institutida turli hududlarda samarali xizmat faoliyatini olib borayotgan bir guruh safdor va serjantlar tarkibidagi xodimlar qayta tayyorgarlikdan o‘tdi.
O‘quv kursi davomida ichki ishlar organlari tizimidagi kadrlar bilan ishlash, jismoniy va yuridik shaxslarning murojaatlari bilan ishlash va ish yuritish, axborot texnologiyalari, aloqa va axborotni himoyalash masalalariga e’tibor qaratildi.
Huquqbuzarliklar profilaktikasi, transportda xavfsizlikni ta’minlash, navbatchilik qismlari faoliyatlarini tashkil etish bo‘yicha nazariy bilim va amaliy ko‘nikmalar shakllantirildi.
Tinglovchilarda fuqarolarning huquqlari, erkinliklari va qonuniy manfaatlarini, jismoniy va yuridik shaxslarning mulkini, qonun ustuvorligi, shaxs, jamiyat va davlatning xavfsizligini ta’minlash bo‘yicha tajribalari oshirildi.
Jamoat tartibini saqlash choralarini ko‘rish, qoidabuzarliklarning oldini olish, fuqarolar bilan profilaktik ishlarni amalga oshirish, ular bilan huquqiy munosabatga kirishish hamda o‘quv dasturi asosida ularning kasbiy mahoratini takomillashtirishga e’tibor qaratildi.
«Vatanparvarlik» oyligi o‘tkazilayotganligi munosabati bilan «Shahidlar xiyoboni», «G‘alaba» va «Yangi O‘zbekiston» bog‘lariga ekskursiyalar tashkil etildi.
Mazkur kurslarni muvaffaqiyatli tugatgan xodimlarga belgilangan namunadagi sertifikatlarni tantanali topshirish tadbiri tashkil etildi.
Unda institut professor-o‘qituvchilari, mas’ul xodimlari, jamoatchilik vakillari, ichki ishlar faxriylari, tinglovchilarning ota-onalari ishtirok etdi.
Institut boshlig‘i Olimjon Ahmedov soha xodimlarini tayyorlash va malakasini oshirishga qaratilayotgan e’tibor tufayli ichki ishlar organlari professional mutaxassislar bilan to‘ldirilayotganini ta’kidladi.
Tadbir yakunida qo‘yilgan talablarni to‘liq bajargan, imtihon va sinovlarni muvaffaqiyatli topshirgan tinglovchilarga sertifikatlar tantanali ravishda topshirildi.
Tahsil olish jarayonida o‘z professional bilimlarini oshirish, amaliy ko‘nikmalarini takomillashtirish, dunyoqarashini yanada kengaytirishga intilib, yuqori ko‘rsatkichlarga erishgani va namunali xulqi uchun bir guruh tinglovchilar faxriy yorliq va tashakkurnoma bilan taqdirlandi.
Shuhrat Ne’matov, O‘zA