Озарбайжоннинг Боку шаҳрида Халқаро теннис федерацияси томонидан ўтказилаётган ўсмирлар ўртасидаги J30 таснифига кирувчи нуфузли халқаро турнирда ўзбекистонлик теннисчилар муваффақиятли иштирок этмоқда.

Мусобақанинг яккалик беллашувларида ҳамюртимиз Маҳмудбек Бекназаров озарбайжонлик Илҳом Бакшалиев ҳамда нейтрал теннисчи Артём Стариковни мағлуб этиб, чорак финалга йўл олди. Ушбу босқичда у руминиялик Матей Сукуга қарши кортга чиқади.

Шунингдек, ўғил болалар ўртасида Амир Сафоев грузиялик Гиорги Гвардзелашвилини, Юсуфбек Маликов эса Виталий Фиодарауни мағлуб этди. Энди Амир нейтрал теннисчи Никита Давидовскийга қарши баҳс олиб боради. Юсуфбек эса исроиллик Итай Килимник билан куч синашади.

Жуфтлик баҳсларида Амир Сафоев ва Асилбек Исмоилов тандеми австриялик Крис Жован Губза ҳамда руминиялик Матей Суку дуэтига қарши чорак финалда майдонга тушади.

Қизлар ўртасидаги яккалик беллашувларида Элнура Болтабоева нейтрал теннисчи Алина Бикбоевани ҳар икки сетда ҳам 6:1 ҳисобида енгди. Шу билан бирга, Элнура жуфтлик баҳсларида қозоғистонлик Тамина Сакен билан бирга чорак финал босқичига йўл олди. Улар ярим финал йўлланмаси учун франциялик Ева-Влада Анисина ва нейтрал теннисчи Елизавета Привалова жуфтлигига қарши баҳс олиб боради.

Жавоҳир ТОШХЎЖАЕВ,

ЎзА