Яқин Шарқдаги кескинлик ва Бирлашган Араб Амирликлари ҳудудига қарши ракета ҳамда дрон ҳужумларидан кейин айрим бой осиёлик сармоядорлар Дубайдаги активини нисбатан хавфсиз ҳисобланган молиявий марказларга кўчириш ҳаракатига тушган. "Reuters" маълумотига кўра, айниқса Сингапур ва Гонконгга пул ўтказиш бўйича мурожаат кўпайган.

Масалан, Дубайда яшовчи икки ҳиндистонлик тадбиркор 100 000 доллардан зиёд маблағини Сингапурга ўтказишга уринган. Технологик муаммо сабаб дастлаб бу иш амалга ошмаган бўлса-да, кейинчалик улардан бири бошқа банк орқали мақсадига эришган.

Мутахассислар таъкидлашича, сўнгги кунларда Дубайда захира тўплаган кўплаб осиёлик бойлар пулини Сингапурга кўчириш имконияти ҳақида маслаҳат олмоқда. Айрим юридик ва молиявий компанияларга ўнлаб оилавий инвестиция идоралари шу масалада мурожаат қилган.

Хусусий капитал ҳуқуқшуноси Райан Лин айтишича, унинг Дубайда активга эга 20 мижозидан камида 6 нафари охирги кунларда алоқага чиққан, уч нафари маблағини зудлик билан Сингапурга ўтказишни режалаштирмоқда.

Бинобарин, ҳамма инвесторлар ҳам Дубайдан чиқиб кетишга шошилаётгани йўқ. Айрим молиявий маслаҳатчилар мижозларга узоқ муддатли истиқболда БАА иқтисодиётига ишонч сақланишини билдирмоқда. Амирлик Марказий банки раҳбари Холид Муҳаммад Балама мамлакат молия тизими барқарорлиги, банклар одатий тартибда ишлаётганини таъкидлаган.

Сингапур ва Гонконгдаги айрим инвестиция компаниялари эса сармоядорлар ҳозирча вазиятни кузатишаётганини айтган. Экспертлар фикрича, агар можаро кўлами янада кенгайса, Дубайдан капитал чиқиб кетиш жараёни тезлашади.

Мусулмон Зиё, ЎзА