Осиё тараққиёт банкининг жанубий, марказий ва ғарбий Осиё ҳудудлари бўйича вице-президенти Инмин Янг бошчилигидаги делегация аъзолари Оролбўйига расмий ташриф давомида мазкур банк иштирокида амалга оширилаётган йирик инфратузилмавий лойиҳалар билан яқиндан танишишди.

Хусусан, А380 “Ғузор-Бухоро-Нукус-Бейнеу” халқаро автомобиль йўлининг Беруний ва Қораўзак туманлари ҳудудидан ўтган 673-698-км оралиғидаги 25 километрлик қисмини цемент-бетон қопламаси билан реконструкция қилиш жараёни ўрганилди. Шунингдек, делегация аъзолари мазкур йўлнинг Тўрткўл - Элликқалъа - Беруний туманлари ҳудудидан ўтган қарийб 87 километрлик қисмини реконструкция қилиш лойиҳаси билан ҳам танишди.

Ушбу йўлнинг қайта қурилиши нафақат минтақанинг транспорт-коммуникация тизимини тубдан яхшилаш, балки халқаро юк ва йўловчи ташиш ҳажмини ошириш, иқтисодий ҳамкорликни янада ривожлантиришга хизмат қилиши алоҳида таъкидланди.

Делегация аъзолари қурилиш ишлари сифати ва амалга оширилиш жараёнига ижобий баҳо бериб, бу борадаги ҳамкорликни янада ривожлантириш истиқболлари юзасидан фикр алмашишди.

Довуд Абибуллаев, ЎзА