Ўзбекистон 45 та давлат орасида 4-ўринда бормоқда. Натижа сақлаб қолинадими? Хитойда давом этаётган 19-Осиё ўйинларининг медаллари учун қизғин курашларга бой мусобақаларнинг учинчи куни ортда қолди. Бугун кун давомида ўтказилган шиддатли баҳслар натижасида мамлакатимиз спортчилари бир қатор спорт турларида медалларга сазовор бўлди.

Кун давомида дзюдо, таэквондо, ўқ отиш, ушу спорт турларида қўлга киритилган совринли ўринлар туфайли “кичик олимпиада” ўйинларида Ўзбекистон мадҳияси янграб, байроғимиз юксалди. Ортда қолган уч кунлик совринли ўринлар сарҳисобига кўра, Хитой спортчилари 48 та олтин, 25 та кумуш, 13 та бронза медаль билан умум жамоада етакчилик қилаётган бўлса, улардан кейинги поғонани банд этган Жанубий Корея делегацияси 7-19-14 та, жами 46 та медаль билан 2-ўринда бормоқда.  

Япония спортчилари 6-18-14 та, жами 38 та медалга эга чиққан ҳолда 3-ўринни банд этиб турибди. Ватанимиз шарафини ҳимоя қилаётган спортчиларимиз эса 5 та олтин, 6 та кумуш, 10 та бронза, жами 21 та медаль билан 4-ўринда бормоқда. Бугунгача Осиё ўйинларида қатнашаётган 45 та давлатдан 23 та мамлакат вакиллари у ёки бу даражадаги совринларга эга бўлишди. Умумий ҳисобда 90 тадан зиёд медаллар жамланмаси ўз эгаларига топширилди.  

Ханчжоу-2022 ёзги Осиё ўйинларининг ортда қолган баҳслари, келгусида кутилаётган натижалар хусусида спорт журналисти Олимхўжа Бўронов билан суҳбатлашдик. Суҳбатнинг тўлиқ матнини ЎзА нинг ютуб канали орқали тамоша қилишингиз мумкин.  

Эслатиб ўтамиз, Ўзбекистоннинг 370 нафардан зиёд спортчилари 38 та спорт туридаги беллашувларда қитъа ўйинларининг совринли ўринлари учун кураш олиб бормоқда. Мусобақалар 8 октябрга қадар давом этади.  

<iframe width="560" height="315" src="https://www.youtube.com/embed/eE4kpCQ3IPY?si=M-LQ3sNT1UmLt6aU" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Т. Рўзиев,ЎзА