Musobaqa dasturidan oʻrin olgan tennis boʻyicha erkaklar oʻrtasidagi yakkalik bahslarida hamyurtimiz Denis Istomin yarim final yoʻllanmasini qoʻlga kiritdi. U chorak finalda qozogʻistonlik Aleksandr Bublikka qarshi kortga tushdi. Birinchi setni 6:1 hisobida oʻz foydasiga hal qilgan turnirning birinchi raqamli ishtirokchisi ikkinchi setni ham koʻtarinki ruhda boshladi va 3:0 hisobida oldinga chiqib oldi. Biroq, bu set oxiriga yetmadi. Boisi Bublik oʻyinni davom ettirolmasligini bildirdi. Shu tariqa Istomin Osiyo oʻyinlarining tennis musobaqalarida yarim finalga yoʻl olgan dastlabki tennischiga aylandi. Yana bir vakilimiz, yosh va umidli sportchi Joʻrabek Karimov ham musobaqada ishtirokini davom ettirmoqda. U bir ozdan soʻng chorak finalda xitoylik Yibing Vuga qarshi kortga chiqadi.