Ўтган йили Саудия Арабистонида футбол бўйича U-17 ёш тоифасидаги жамоалар ўртасида ўтказилган қитъа кубогида Осиё чемпионлигини қўлга киритган Ўзбекистон U-17 терма жамоаси аъзоси, истеъдодли ярим ҳимоячи Сайфиддин Содиқов фаолиятини “Андижон” жамоасида давом эттирадиган бўлди.

Бу ҳақда хабар берган “Андижон” футбол клуби жамоа селекция жараёнида тажрибали ўйинчилар билан бирга келажаги порлоқ футболчиларга ҳам эътибор қаратаётганини келтириб ўтди.

Яқинда “Андижон” жамоаси Анталияда ўтказган йиғинда маҳоратли  ярим ҳимоячи Сайфиддин Содиқов қатнашганини ҳамда ушбу ўқув-йиғин натижаларига кўра, клуб у билан меҳнат шартномаси имзолаганини эълон қилди.

Эслатиб ўтамиз, 2008 йил Тошкент шаҳрида таваллуд топган Сайфиддин Содиқов “Одил Жуниор” академияси тарбияланувчиси ҳисобланади.

Т.Рўзиев, ЎзА