O‘tgan yili Saudiya Arabistonida futbol bo‘yicha U-17 yosh toifasidagi jamoalar o‘rtasida o‘tkazilgan qit’a kubogida Osiyo chempionligini qo‘lga kiritgan O‘zbekiston U-17 terma jamoasi a’zosi, iste’dodli yarim himoyachi Sayfiddin Sodiqov faoliyatini “Andijon” jamoasida davom ettiradigan bo‘ldi.

Bu haqda xabar bergan “Andijon” futbol klubi jamoa seleksiya jarayonida tajribali o‘yinchilar bilan birga kelajagi porloq futbolchilarga ham e’tibor qaratayotganini keltirib o‘tdi.

Yaqinda “Andijon” jamoasi Antaliyada o‘tkazgan yig‘inda mahoratli  yarim himoyachi Sayfiddin Sodiqov qatnashganini hamda ushbu o‘quv-yig‘in natijalariga ko‘ra, klub u bilan mehnat shartnomasi imzolaganini e’lon qildi.

Eslatib o‘tamiz, 2008-yil Toshkent shahrida tavallud topgan Sayfiddin Sodiqov “Odil Junior” akademiyasi tarbiyalanuvchisi hisoblanadi.

T.Ro‘ziyev, O‘zA