Ўзбекистонлик мутахассислар - ҳакам, назоратчи ҳамда комиссарлар қитъа ва халқаро миқёсдаги турли нуфузли мусобақаларга мунтазам равишда таклиф этилаётганлиги, уларнинг аксариятида ҳал қилувчи учрашувларни бошқариш ҳамюртларимизга ишониб топширилаётганлиги қувонарли. Қитъамизнинг клублар миқёсидаги энг нуфузли мусобақаси – Осиё Чемпионлар лигасининг 2019 йилги мавсуми ҳам ниҳоясига етиш арафасида. Эртага, 24 ноябр куни Осиё Чемпионлар лигаси-2019 ғолиби номи маълум бўлади.

Хабарингиз бор, қитъа Чемпионлар лигаси финали уй-меҳмон тизимида ўтказиб келинади. Жорий йилги мусобақа финалига Япониянинг “Урава Ред Даймондс” ва Саудия Арабистонининг “Ал Ҳилол” клублари етиб келишди. 9 ноябр куни Саудия Арабистонида ўтган дастлабки ўйинда саудияликлар 1:0 ҳисобида ғалаба қозонишган эди. Эртага эса Японияда “Саитама” ўйингоҳида жавоб ўйини ўтказилади. 

ОФК мазкур ҳал қилувчи учрашувни бошқариб бориш вазифасини ўзбекистонлик ҳакамлар гуруҳига ишониб топширди. Бош ҳакам – Валентин Коваленко. Унга Андрей Цапенко, Тимур Гайнуллин, Азиз Асимов ҳамда Илгиз Танташев ёрдам беришади. Захира ҳаками – Руслан Серазитдинов.

Учрашувнинг назоратчиси ҳиндистонлик Сринивасан Суреш, комиссарлик масъулияти эса малайзиялик Моҳд Сайфиддин Бин Абу Бакарга юклатилган.