Бугун нафақат Марказий Осиё мамлакатлари, балки бутун жаҳон ҳамжамияти иқлим ўзгариши туфайли юзага келаётган муаммо ва таҳдидларга жавоб топишга интилмоқда.
Бу муаммолар қаторига атмосферада иссиқхона газларининг кўпайиши, ернинг устки қобиғи ҳароратининг ортиши, сув ресурслари тақчиллиги, табиий офатларнинг тез-тез такрорланиши, чўлланиш жараёнининг ўсиши ва бошқаларни киритиш мумкин. Шу ўринда глобал иқлим ўзгаришининг салбий оқибатларини бартараф этишда ўсимликлар генетик ресурсларининг ўрни ҳам беқиёс саналади.
Пойтахтда ўтказилган Ўсимликлар генетик ресурслари илмий-тадқиқот институтининг 100 йиллигига бағишланган “Глобал иқлим ўзгаришлари ва озиқ-овқат хавфсизлигида ўсимликлар генетик ресурсларининг роли” мавзусидаги халқаро илмий-амалий симпозиумда ҳам айни шу масалалар хусусида сўз юритилди.
Тадбирда ўзбекистонлик олимлар, халқаро ҳамда маҳаллий ташкилотлар вакиллари иштирок этди. Симпозиумда қишлоқ хўжалиги вазири ўринбосари Алишер Шукуров сўзга чиқиб, Ўсимликлар генетик ресурслари илмий-тадқиқот институтининг 100 йиллиги билан табриклади. Бугунги кунда қишлоқ хўжалигида генетиканинг аҳамияти ҳақида тўхталиб ўтди.
Мазкур симпозиумни ўтказишдан мақсад ўсимликлар генетик ресурсларини сақлаш ва улардан фойдаланишнинг долзарб масалаларини муҳокама қилиш, халқаро ҳамкорликни ривожлантириш ва илмий тадқиқотларнинг янги йўналишларини белгилашдан иборат.
Симпозиум доирасида глобал иқлим ўзгаришлари шароитида ўсимликлар генетик ресурсларини сақлаш ва улардан фойдаланиш, озиқ-овқат хавфсизлигини таъминлашда ўсимликлар генетик ресурсларининг роли, ўсимликлар генетик ресурсларини ўрганиш ва улардан фойдаланишда замонавий биотехнологик усуллар, ўсимликлар генетик ресурсларини халқаро миқёсда алмашиниш ва ҳамкорлик каби масалалар атрофлича муҳокама қилинди.
Бундан ташқари, тадбир доирасида 30 га яқин тематик сессиялар ташкил этилган бўлиб, уларда ўсимликлар генетикаси соҳасида амалга оширилган энг сўнгги ишланмалар ҳамда мавжуд муаммоларга ечим сифатида бир қанча таклифлар берилди.
Муҳайё Тошқораева, ЎзА