Жапонияның Осака қаласында өтіп жатқан «Expo 2025» Дүниежүзілік көрмесі аясында Өзбекстанның Ұлттық күні салтанатты түрде атап өтілді.

Іс-шараның ашылу рәсіміне Мәдениет және өнерді дамыту қорының төрайымы Гаянэ Умерова, сондай-ақ Инвестициялар, өнеркәсіп және сауда министрі Лазиз Қудратов бастаған ресми делегация қатысты.

Меймандар назарына әлемге әйгілі өзбек биі - лазги, сондай-ақ ұлттық әндерден құралған концерттік бағдарлама ұсынылды. Вокал ансамбльдері мен халық аспаптар оркестрінің сүйемелдеуі көрермендерге ерекше көңіл-күй сыйлады. Сонымен қатар, Өзбекстанның еңбек сіңірген әртісі Нодира Пирматова мен Мукарам Турғунбаева атындағы «Бахор» мемлекеттік би ансамблі өнер көрсетті.

Көрменің негізгі аумағында ұйымдастырылған түрлі-түсті мәдени шеру Ұлттық күннің көркін аша түсті. Онда ондаған өнерпаз, дауылпаздар мен бишілер қатысып, көрермендерге жарқын бейнелер мен ұлттық дәстүрлерге бай әсер қалдырды. Бұл көрініс Өзбекстанның жаһандық мәдени кеңістікке белсенді қадам басып жатқанын білдіретін мәдени дипломатия көрінісіне айналды.

Сапар аясында Мәдениет және өнерді дамыту қоры, Нара қаласы әкімшілігі және Нара ұлттық музейі арасында үшжақты өзара түсіністік туралы меморандумға қол қойылды. Келісімге сәйкес, 2027 жылы Ұлы Жібек жолы бойындағы мәдени байланыстарға арналған ауқымды көрме ұйымдастыру жоспарланып отыр. Сонымен қатар, мәдени мұраны сақтау бағытында академиялық, музейлік және кәсіби саладағы ынтымақтастықты кеңейту көзделген.

Аталған құжатқа қол қойылуы Өзбекстанның мәдени дипломатияны жаңа деңгейге көтеру жолындағы тағы бір маңызды қадамы болды. Себебі, ел Жапониямен әртүрлі мәдени бағытта ынтымақтастықты нығайтып, ұлттық мұрасын халықаралық деңгейде кеңінен таныстырып келеді.