Cportga yangi muhit olib kirib Boksni O‘zbek brendi darajasiga olib chiqqan ammo ma’lum bir sabablarga ko‘ra sportdan biroz muddatga uzoqlashgan va yana katta sahnaga qaytayotgan Sherzod Toshmatov haqida so‘z yuritmoqchiman.
U AMALGA OSHIRGAN ISHLAR BOR XAQIQAT...
Sherzod Toshmatov – sportdagi faoliyatini 2009 yil O‘zbekiston muaytay federatsiyasi rahbarligidan boshlagan.
2010-yil. Poytaxtimizda muaytay bo‘yicha Osiyo chempionatini tashkil etdi. Qit’a birinchiligi yuqori saviyada o‘tganligi sabab Xalqaro kongressda Jahon chempionatini o‘tkazish uchun da’vogar bo‘lgan ko‘plab mamlakat delegatsiyalari orasida dunyo birinchiligi ham O‘zbekistonga ishonib topshirilgan.
2011-yil. Jahon chempionati muaytay tarixida zarhal harflar bilan bitildi. Dunyoning 70 ga yaqin mamlakatlaridan sport delegatsiyalarini bag‘riga olgan O‘zbekiston musobaqasi tom ma’noda “yilning olamshumul” musobaqasi deb tan olindi. Jahon chempionati vaqtida o‘tgan xalqaro kongressda Sh.Toshmatov Butunjahon muaytay assotsiatsiyasi vitse-prezidentligiga saylandi. Yil yakunida Vazirlar mahkamasi tomonidan Tashmatovga “Mohir tashkilotchi” diplomi topshirildi. Sharq yakka kurashlari va jang san’atlarini rivojlantirish markazi vitse-prezidenti yakka kurash turlariga ixtisoslashtirilgan 26 ta federatsiyalar rivojiga o‘z hissasini qo‘shdi.
2012-2013 yillari Professional muaytaychilar o‘rtasida “Buyuk ipak yo‘li” Xalqaro turniriga asos solindi. Toshkent, Samarqand shaharlarida chet ellik yetakchi sportchilar ishtirokida katta sport kechalari tashkil etildi. Sportchi qizlar o‘rtasida “To‘maris” Respublika tanlovlarini o‘tkazishga bosh-qosh bo‘ldi.
BOKS HAM ISHONIB TOPSHIRILDI
Sport tadbirlarini tashkil etish bo‘yicha katta tajribaga ega bo‘lgan va deyarli yangi o‘zgarishlar yo‘lida tinimsiz izlanib kelgan yosh mutaxassis 2014 yildan O‘zbekiston boks federatsiyasining 1-vitse prezidenti lavozimida ishini davom ettirdi.
Boksga yangicha qarash va yangi qon olib kirgan Toshmatov bu turdagi barcha ishlash tizimini o‘zgartirdi. Aynan shu yillardagi boksda keskin ortga ketish kuzatilgandi. Mutaxassislar Toshmatov shu ishni davom ettirishiga ko‘zlari yetgan edi. Toshmatov birinchi navbatda murabbiylar e’tiroziga qaramasdan o‘zi individual ravishda seleksiya asosida yangi terma jamoani shakllantirdi.
2015-yil Olimpiya o‘yinlari uchun beriladigan litsenzion musobaqa oldi jamoani iqlimga moslashish uchun bir oy oldin musobaqa o‘tadigan davlatning o‘zida mashg‘ulotlarni o‘tkazish uchun yo‘naltirdi. Bundan tashqari AIBA rahbari janob Ching-Kuo Vu bilan xalqaro munosabatlarni to‘g‘ri yo‘lga qo‘ya oldi. Hamda ushbu tashkilotning eng nufuzli hisoblangan, olimpiadaga yo‘llanma beruvchi APB va WSB Butunjahon boks seriyasidagi musobaqalarini yurtimizga olib keldi.
Rio-2016 olimpiadasi oldidan boks bo‘yicha dunyoda gegemon bo‘lgan Kuba terma jamoasi o‘quv-yig‘in mashg‘ulotlarini O‘zbekistonning asosiy tarkib jamoasi bilan birga o‘tkazish taklifini berishdi. Mazkur hamkorlik esa kutilgandan-da ko‘proq o‘zining ijobiy samarasini berdi.
Rio-2016 olimpiadasidan bir oy avval bokschilarimiz iqlimga moslashish uchun Rio-de-Janeyroga yetib borishdi. Mazkur to‘rt yillikning nufuzli musobaqasi O‘zbek sporti tarixida o‘chmas iz qoldirdi. Ulkan natija aynan bokschilarimizga tegishli bo‘ldi. 10 ta vaznning 7 tasida charm qo‘l qop ustalarimiz olimpiadaning turli probali medallariga ega chiqishdi.
2017-yil AIBAning ijroiya qo‘mitasi a’zolari orasida eng yoshi sifatida ovoz berish huquqi bilan faoliyatini davom ettirdi. Shu yil kattalar o‘rtasidagi Osiyo chempionati O‘zbekistonda tashkil etildi. Bu musobaqada xam qit’a chempionatlarida qayd etilmagan tarixiy ko‘rsatkich ya’ni shu vaqtga qadar hech bir Osiyo mamlakatlari erisha olmagan 10 ta vaznning 9 tasida yuqori probali medallar sportchilarimiz tomonidan qo‘lga kiritildi.
2018-yil Indoneziya. Osiyo olimpiadasi. Sh.Toshmatov boshchiligidagi yetakchi charm qo‘l qop ustalarimiz 5 ta oltin va 2 ta kumush medallari egasiga aylandi...
O‘Z KASBIGA MUNOSIBNING QAYTISHI
Sportda shunday, g‘alaba va mag‘lubiyat yonma-yon yuradi. Mashhur murabbiylardan biri Anatoliy Tarasovning bir gapi bor: “Hayotda ikkinchi bo‘limning o‘zi yo‘q, qiladigan ishing va vazifalaringni sen uchun berilgan birinchi bo‘limda bajarib ol”. O‘z vazifasini sidqidildan bajarib kelayotgan, nafaqat Osiyo va jahon, balki Olimpiya o‘yinlarida ham natija ko‘rsata olgan Toshmatov shaxsiga nisbatan ham turlicha qarashlar paydo bo‘la boshlagan edi. 2018 yilda mamlakat sportining yangi rahbariyati Butunjahon boks seriyasi (WSB)da O‘zbekiston sharafini himoya qilib kelayotgan «Uzbek Tigers» jamoasi faoliyatini to‘xtatishga qaror qildi. Federatsiya vitse-prezidenti ish faoliyatiga aralashuvlar uning ishchanlik kayfiyatiga salbiy ta’sir ko‘rsatdi. Ammo bu Sherzod Toshmatovni ruhan sindira olmadi.
Ayni kunda Sh.Toshmatov O‘zbekiston Milliy Olimpiya qo‘mitasining rais o'rinbosari sifatida faoliyatini qayta boshladi.
Yurtimizda davlatimiz rahbari boshchiligida jismoniy tarbiya va sportni rivojlantirish, sog‘lom avlodni tarbiyalash, yurtimizda olimpiya harakatini rivojlantirishga katta e’tibor qaratilyapti. Ana shu islohotlarning faol targ‘ibotchisi va izchil amalga oshiruvchi shaxs sifatida O‘zbek sportida o‘rniga ega bo‘lgan Sherzod Toshmatov kelgusida ham o‘z zimmasiga yuklatilgan mas’uliyatli ishda ham tub burilish yasab yurt sporti ravnaqi yo‘lida astoydil mehnat qilishiga ishonamiz.
Chunki buning uchun Sh.Toshmatovda tajriba va salohiyat yetarli.
Sh.OTABOEV