Өзбекстан Республикасының Орталық банкі банк қызметіне қойылатын талаптар мен AML/CFT қағидаларын бұзғаны үшін 4 банкке айыппұл санкцияларын қолданды.

Орталық банктің баспасөз қызметі хабарлағандай, биыл қараша айында жүргізілген инспекциялық тексерулер қорытындысы бойынша бірқатар қаржы ұйымдарына қатысты тиісті шаралар қабылданған.

Тексеру нәтижесінде пруденциялық талаптар мен қолданыстағы заңнама нормаларын сақтамағаны үшін бір микроқаржы ұйымына және бір төлем ұйымына ресми ескерту берілді. Ал Орталық банк талаптары мен ақшаны жылыстатуға, терроризмді қаржыландыруға қарсы күреске бағытталған AML/CFT қағидаларын бұзған төрт банкке айыппұл салынды.

Атап айтқанда, Орталық банктің Банктік қадағалау комитеті 2025 жылдың қараша айында алты рет отырыс өткізіп, оның барысында барлығы 41 мәселе қаралып, тиісті қаулылар қабылданған. Соның ішінде тіркеу және рұқсат беру бағыты бойынша 31 мәселе талқыланса, кредиттік ұйымдардың қаржылық жай-күйіне қатысты 10 мәселе күн тәртібіне шығарылды.

«Бұл мәселелер Орталық банк нұсқаулары мен пруденциялық нормативтердің сақталуы, банктер мен микроқаржы ұйымдарында жүргізілген тексерулердің нәтижелері, банк қызметтерін тұтынушылардың құқықтарын қорғау, сондай-ақ қылмыстық жолмен алынған кірістерді заңдастыруға, терроризмді және жаппай қырып-жою қаруын таратуды қаржыландыруға қарсы күрес шараларын қамтыды», делінген хабарламада.

Инспекциялық тексерулер барысында анықталған заңбұзушылықтар негізінде бір микроқаржы ұйымына және бір төлем ұйымына ескерту жасалып, төрт банкке айыппұл санкциялары қолданылды.