Өзбекстан Орталық банкі 5, 10, 20 және 50 граммдық алтын құймаларына қосымша ретінде 100 грамм салмақтағы жаңа алтын құймаларды коммерциялық банктер арқылы сатылымға шығарды.

Бұл қадам елдегі халықтың инвестициялық және жинақтау мүмкіндіктерін арттыру, сондай-ақ қымбат металдар айналымын кеңейту мақсатында қабылданғаны туралы Орталық банктің баспасөз қызметі хабарлады.

Алтын құймалар арнайы қорғаныс қаптамаларында сатуға ұсынылып, олардың қаптамасы сертификат ретінде қызмет етеді және әрбір құйманың өзіндік серия нөмірі болады. Алтын құймалардың сату бағасы күн сайын Орталық банктің ресми веб-сайтында жарияланып отырады. Қаптамасы бүтін күйде сақталған алтын құймалар сатылым бөлімшелерінде төлем арқылы қайта сатып алынуы мүмкін.

Қаптамасы бүлінген немесе техникалық талаптарға сай келмейтін алтын құймаларды қайтару үшін оларды техникалық сараптамадан өткізу қажет, ал сараптама нәтижесінде төлем төленеді. Сонымен қатар, қаптамасы бүтін күйдегі алтын құймаларды Өзбекстан аумағынан тыс жерлерге шығаруға рұқсат беріледі.

Айта кетейік, 2024 жылы Өзбекстанның халықаралық резервтері 6,6 миллиард долларға (19,1 пайызға) өсіп, жыл соңында жалпы көлемі шамамен 41,2 миллиард долларды құрады.