Ташкент қаласында өткен Орталық Азия мемлекеттері мен Оңтүстік Корея Республикасы парламенттері басшыларының үшінші отырысы аяқталды.

«Адам қадір-қасиетін ұлықтау, әлеуметтік әділеттілік пен қоршаған ортаны қорғау жолындағы ынтымақтастық» тақырыбындағы беделді форум аясында пленарлық отырыстар мен сессиялар ұйымдастырылды.

Осынау жиын барысында адам қадірін ұлықтау, әлеуметтік әділеттілікті қамтамасыз ету және қоршаған ортаны қорғау мәселелері бойынша парламенттер арасындағы ынтымақтастықты тереңдетуге бағытталған мәселелер жан-жақты талқыланды.

Сонымен қатар, экономикалық әріптестік пен цифрлық трансформация бағыттары бойынша пікір алмасылып, цифрлық экономиканы дамыту, инновациялық шешімдерді енгізу, шағын және орта бизнесті қолдауға арналған ұсыныстар әзірленді.

Экология және «жасыл» саясат мәселелері аясында климаттың өзгеруі салдарын жұмсарту, табиғи ресурстарды ұтымды пайдалану, экологиялық заңнаманы жетілдіру, сондай-ақ осы бағытта парламенттік бақылауды күшейту жөніндегі ұсыныстар қаралды.

Кездесу барысында адам құқықтары мен гендерлік теңдікті қамтамасыз ету мәселелеріне де айрықша назар аударылды. Қатысушылар гендерлік теңдік, жастар саясаты, білім беру және мәдени алмасуларды дамыту бағытындағы ынтымақтастықты жалғастыру жөнінде ұсыныс білдірді.

Жиын соңында Орталық Азия мемлекеттері мен Корея Республикасы парламенттері басшыларының үшінші отырысының Бірлескен декларациясы қабылданды.

Алдағы кезеңде парламенттік дипломатияны нығайту, заң шығару саласындағы озық тәжірибелер алмасу және диалог алаңдарын кеңейту бойынша ынтымақтастықты жалғастыру туралы уағдаластыққа қол жеткізілді.

Орталық Азия мемлекеттері мен Оңтүстік Корея Республикасы парламенттері басшыларының кезекті – IV отырысы 2026 жылы Қазақстан Республикасында өтеді.

суреттерді түсірген Н.Хайдаров, ӨзА