ӨР Инвестициялар, индустрия және сауда министрі Лазиз Қудратов «Орталық Азия – Қытай» сыртқы экономикалық және сауда қызметіне жауапты министрлердің бейнеконференция форматындағы бірінші отырысына қатысты.

Кездесу барысында Орталық Азия елдері мен Қытай Халық Республикасы арасындағы сауда-экономикалық және инвестициялық ынтымақтастықтың қазіргі жағдайы талқыланды. Қарым-қатынастарды одан әрі дамыту перспективалары, соның ішінде сауда рәсімдерін ырықтандыру және жеңілдету, инвестиция тарту, көпжақты сауда жүйесін кеңейту, өнімдерді өзара жеткізу көлемін ұлғайту, цифрлық экономиканы енгізу, көлік инфрақұрылымын дамыту, өңіраралық әріптестікті нығайту мәселелері талқыланды.

Лазиз Қудратов «Орталық Азия – Қытай» аймағының орасан зор транзиттік әлеуетін тиімді пайдаланудың маңыздылығын, сондай-ақ жүк тасымалының үздіксіздігін қамтамасыз ету және трансшекаралық логистикалық желіні дамытудың жүйелі шешімін әзірлеу қажеттігін атап өтті.

Өңіраралық байланысты тереңдету бойынша жұмысты жалғастырудың маңыздылығы сөз болды. Осыған орай, бизнес-қоғамдастықтың ынтымақтастығын кеңейту және жаңа өсу нүктелерін ашу мақсатында ағымдағы жылдың екінші жартысында Өзбекстанда Орталық Азия елдері мен Қытай өңірлері басшыларының форумын өткізу ұсынылды. 

Цифрлық сауданы кеңейту аясындағы ынтымақтастықты жандандыру перспективасы талқыланып, «Цифрландыру дәуіріндегі экономика мен сауданы дамыту бағдарламасын» әзірлеу бастамасы көтерілді. Бұл үдерісте аймақ елдерінің ІТ-парктері негізінде «Интеллектуалды Жібек жолы» бірлескен платформасын құру көзделген.

Кездесуге қатысушылар қол қою жоспарланған сауда-экономикалық келісімдерді, сондай-ақ «Қытай – Орталық Азия» аясында цифрлық сауда бойынша ынтымақтастықты көздейтін меморандумдар сәтті келісіліп, тараптар өзара тиімді қарым-қатынастарды одан әрі кеңейтуге бағытталған ынтымақтастықты жалғастыруға уағдаласқан.