Qoraqalpog‘iston  Respublikasi shahar va tumanlarida “Yoshlar turizmi haftaligi” yuksak saviyada davom etmoqda.

Davlatimiz rahbarining 2022 yil 30 apreldagi “Ichki turizm xizmatlarini diversifikatsiya qilishga oid qo‘shimcha chora-tadbirlar to‘g‘risida”gi qarori ijrosini ta’minlash maqsadida Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasi tomonidan Yoshlar ishlari agentligi, Oliy ta’lim, ilm va innovatsiyalar vazirligi, Maktabgacha va maktab ta’limi vazirligi bilan hamkorlikda joriy yilning 1-10 yanvar kunlari mamlakatimizda “Yoshlar turizmi haftaligi” e’lon qilindi.  

[gallery-15404]

Tadbirni o‘tkazishdan maqsad oliy va o‘rta maxsus o‘quv yurtlari talabalari, umumta’lim maktablari o‘quvchilarining, mahallalardagi hamda nogironligi bo‘lgan yoshlarning mamlakatimizning diqqatga sazovor joylariga sayohat qilishi,ularni  yurtimizning boy tarixi, madaniy merosi, turistik imkoniyatlari bilan yaqindan tanishtirish, madaniy va ma’naviy hordiq chiqarish hamda dam olishini mazmunli o‘tkazish uchun qulay shart-sharoit yaratishdan iborat. Ushbu davrda 7 yoshdan 30 yoshgacha bo‘lgan o‘quvchi hamda talaba- yoshlar respublika bo‘ylab diqqatga sazovor joylarga tashrif buyurish, ziyorat qilish uchun maxsus chegirmalarga ega bo‘lmoqda. Jumladan, madaniy meros ob’ektlari, muzeylar, teatrlar, kinoteatrlar va konsertlarga yoshlarning jamoaviy tashrifi tashkil etilmoqda. 

Haftalik doirasida Nukus shahridagi markaziy maydonda o‘rnatilgan Yangi yil archasi atrofida har kuni bayram konsert dasturi, Berdaq nomidagi Qoraqalpoq davlat akademik musiqali teatrida “Sovg‘a” teatrlashtirilgan konsert dasturi, Qoraqalpog‘iston san’at saroyida “Yangi yil tomoshasi” bayram tadbiri, Nukusdagi I.Savitskiy nomidagi Qoraqalpoq davlat san’at muzeyida “Selfi kuni” ko‘rik-tanlovi, Qoraqalpoq davlat Yosh tomoshabinlar teatrida  yangi yil spektakllari, yoshlarni qiziqtiradigan bir qator madaniy-ko‘ngilochar tadbirlar oliy va o‘rta maxsus o‘quv yurtlari talabalari, umumta’lim maktablari o‘quvchilari, mahalla hamda nogironligi bo‘lgan yoshlarda katta taassurot qoldirmoqda.  

<iframe width="650" height="420" src="https://www.youtube.com/embed/rsgnokI41pE" title="Orolboʻyida  “Yoshlar turizmi haftaligi”" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Dovud Abibullayev, Maqsad Habibullayev (surat,video), O‘zA muxbirlari