Фарғона вилоятида бугунги кунда 19 нафар Иккинчи жаҳон уруши қатнашчиси бор. Уларнинг ибратли ҳаёт йўли, турли жабҳалардаги фидокорона фаолияти ёш авлодни она Ватанга муҳаббат, миллий истиқлол ғояларига садоқат, умрбоқий анъана ҳамда қадриятларимизга ҳурмат ва эҳтиром руҳида тарбиялашда катта аҳамиятга эга бўлмоқда.

Президентимизнинг 2 май куни қабул қилинган “Иккинчи жаҳон уруши қатнашчиларини рағбатлантириш тўғрисида” ги фармони уларга бўлган эъзознинг ёрқин ифодасидир. Унга кўра, Иккинчи жаҳон уруши қатнашчилари ва ногиронларининг ҳар бирига 18 миллион сўм миқдорида бир марталик пул мукофоти берилади.

1941-1945 йиллардаги уруш даврида мамлакат бошига тушган оғир синовлар Ўзбекистоннинг бошқа ҳудудлари каби Фарғона вилоятига ҳам катта таъсир қилди. Фарғоналиклар урушда тезроқ ғалаба қозониш учун ҳар қандай топшириқларни бажаришга тайёр эканликларини билдирди. Уруш бошлангач вилоятдан 150 мингдан ортиқ киши Иккинчи жаҳон урушига сафарбар қилинди. Улардан 54 минг 981 нафари ҳалок бўлган, айримлари бедарак йўқолган. 14 минг 912 нафар фарғоналик жангда кўрсатган мардлиги, жасоратлари учун Иттифоқ Қаҳрамони ҳамда жанговар орден ва медаллар билан тақдирланди.  

Орамиздаги тирик афсоналар барчамизга тинч ва дориломон кунларимизга шукроналикни, бугунги фаровон ҳаётимизга осонлик билан эришилмаганини бот-бот такрорлайди. Тошлоқ тумани Заркент қишлоғида яшовчи Иккинчи жаҳон уруши қатнашчиси Файзулло ота Эминов барчанинг фахри. Пиру бадавлат отахон бугун фарзандлари, невара-чеваралари ардоғида умргузаронлик қилмоқда. У машъум уруш хотираларини оғриниб сўзлайди, тинчликнинг қанчалик буюк неъмат эканлиги, уни асраш учун ҳар бир инсон ҳаракат қилмоғи кераклигини таъкидлашдан чарчамайди.  

Файзулло ота 1924 йил 28 январда Тўқибой маҳалласида туғилган. Мактабнинг 8-синфини битирибоқ тумандаги Ленинград колхозида иш бошлаган. 1943 йил тенгдошлари сафида Иккинчи жаҳон урушига сафарбар этилади. Урушни Украинада бошлаб Берлинга қадар етиб боради. Лекин буюк ғалабага бир неча кун қолганда ярадор бўлиб, ҳарбий госпиталда даволанади. Она юрти Ўзбекистон, жонажон қишлоғига 1945 йил 22 май куни соғ-саломат қайтиб келиб, жамоа хўжалигида 3 йил ҳисобчи, 13 йил биргадир лавозимларида фаолият олиб боради. Турмуш ўртоғи Меҳрихон она Комилова билан 9 нафар фарзанд - 6 ўғил, 3 қизни ўстириб, улғайтириб уларнинг эл-юрт корига ярайдиган ўқитувчи, шифокор ва бошқа касб эгалари этиб тарбиялайди. Ҳозирда 35 та набира, 81 та чевара, 14 та эваралари даврасида кексалик гаштини сурмоқда. Ҳалол меҳнати билан элда эъзоз топди.  

– Урушнинг номи ўчсин, унинг азобу уқубатларини биз кўрдик, сизлар асло кўрманг. Илоҳим мустақил диёримизда тинчлик ва хотиржамлик, иқтисодий юксалиш абадий, барқарор бўлсин, – дейди биз билан суҳбатда Иккинчи жаҳон уруши қатнашчиси Файзулло ота Эминов. – Шундай кунларга етказганига шукур. Уруш фахрийси сифатида нуронийларга, хусусан, Иккинчи жаҳон уруши қатнашчиларига кўрсатилаётган катта ғамхўрлик, эътибор учун беҳад миннатдормиз.

М.Сулаймонов,  

ЎзА