Бугунги кунда аҳоли, айниқса, ёшлар ва хотин-қизларнинг билим ва кўникмаларини ошириш, уларнинг касб-ҳунар эгаллашига янгича ёндашишни замоннинг ўзи талаб этмоқда. Айниқса, уларда тадбиркорлик ва бизнес кўникмаларини шакллантириш, касбий малакасини ошириш орқали иқтисодий ўсишни таъминлаш энг долзарб масалалардан бири ҳисобланади.

Бу борада Президентимизнинг 2020 йил 11 августдаги “Камбағал ва ишсиз фуқароларни тадбиркорликка жалб қилиш, уларнинг меҳнат фаоллигини ошириш ва касб-ҳунарга ўқитишга қаратилган ҳамда аҳоли бандлигини таъминлашга оид қўшимча чора-тадбирлар тўғрисида”ги қарори ҳамда 2021 йил 27 январь куни давлатимиз раҳбари раислигида ёшлар бандлигини таъминлаш ва бўш вақтларини мазмунли ташкил этиш борасида ўтказилган видеоселектор йиғилишида устувор вазифалар белгиланган.

Ушбу вазифалар ижроси доирасида Иқтисодий тараққиёт ва камбағалликни қисқартириш вазирлиги ҳузуридаги Бизнес ва тадбиркорлик олий мактабининг ҳудудий филиаллари томонидан аҳоли, жумладан, ёшлар ва хотин-қизларни кичик бизнес ва тадбиркорликка ўқитиш, янги иш ўринлари яратиш, камбағалликни камайтириш, бизнес ва тадбиркорлик муҳитини яхшилаш борасида кенг кўламли ишлар олиб борилмоқда.  

Хусусан, 2021 йил 15 февралдан бошлаб Олий мактабнинг Қорақалпоғистон ҳудудий филиалида ҳам хотин-қизлар ва ёшлар учун 28 та йўналиш бўйича қисқа муддатли ўқув курслари ташкил қилинди. Ўқув курсларида “Аёллар дафтари”да рўйхатда турувчи, иш қидираётган ёки ишсиз сифатида рўйхатга олинган, тадбиркорлик фаолиятини бошлаш истагидаги хотин-қизлар ва тадбиркор аёллар фаол қатнашмоқда.

Айтиш жоизки, 2021 йил 30 март ҳолатига кўра республика бўйлаб ташкил этилган ўқув курсларида 1300 нафардан зиёд аҳоли, ёшлар ва хотин-қизлар бепул ўқитилиб, уларнинг барчасига сертификат топширилган. Эътиборлиси, уларнинг 70 фоиздан ортиғи ўз тадбиркорлик фаолиятини йўлга қўйиш арафасида, қолганлари эса ўз фаолиятини кенгайтириш бўйича ишламоқда. Ушбу курсларда 2021 йил Олий мактаб томонидан 43 минг 120 нафар, 2022 йилда 100 минг, 2023 йилда 200 минг нафар аҳолини тадбиркорликка ўқитиш режалаштирилган. Мазкур режани амалга ошириш борасида Олий мактаб вазирлик ва идоралар билан самарали ҳамкорликни йўлга қўйган.

Қорақалпоғистон Республикаси Иқтисодий тараққиёт ва камбағалликни қисқартириш вазири билан бўлиб ўтган ишчи учрашувда ҳудуд аҳолиси, тадбиркорлик фаолиятини бошлаш истагидаги хотин-қизлар, тадбиркор аёллар, иш қидираётган ёки ишсиз сифатида рўйхатга олинган фуқаролар малакаси, билим ва кўникмасини ошириш, янги иш ўринлари яратиш, камбағалликни камайтириш бўйича ўзаро фикр алмашилди.

Ўқув дастуридаги барча мавзу доирасида тингловчиларни қизиқтирган саволларга жавоблар, тадбиркорларни қийнаётган муаммоларга ечим топишда тегишли кўрсатма, шунингдек, тадбиркорлик фаолияти бўйича амалга оширилаётган сўнгги ислоҳотлар, соҳани янада ривожлантириш бўйича қабул қилинган қарор ва фармонлар мазмун-моҳияти бўйича ҳам тушунтириш бериляпти.

Ўқув курслари якунида тингловчилар танлаган фаолият йўналишларига қараб бизнес-режа тузади ва тест топширади. Бизнес-режани муваффақиятли ҳимоя қилган ва тестлардан ўтган тингловчиларга курс якуни бўйича сертификат берилади.

– Курс қатнашчиларининг таълим олиши, билими ва кўникмаларини ошириш, таълим жараёнини тўлақонли ташкил қилиш учун ўқув аудиториялари замонавий жиҳозлар билан тўлиқ таъминланган, — дейди Бизнес ва тадбиркорлик олий мактаби директори ўринбосари Ш.Исакулов. 

— Ўқув жараёнида замонавий педагогик технологиялардан самарали фойдаланиляпти. Албатта, дастурларни ишлаб чиқиш ва тренинглар ўтказишда, энг аввало, сифат, қиймат ва натижага эътибор қаратилмоқда. Иштирокчиларнинг ўз бизнес ғоялари асосида бизнес режаларини ишлаб чиқиш борасида назарий ва амалий машғулотлар билан бир қаторда, вилоятда фаолият юритаётган кичик бизнес ва хусусий тадбиркорлик субъектларининг ишлаб чиқариш ва хизмат кўрсатиш корхоналари, кичик саноат зоналарига ташрифлар ташкил этилмоқда.

Ш.Маматуропова, ЎзА