1 октябрь – Ўқитувчи ва мураббийлар куни

Бугун ўз устида тинимсиз ишлайдиган, касбига садоқат билан ёндашаётган ўқитувчилар замони келди, десак адашмаймиз. Зеро, интилувчан педагоглар учун барча имконият яратилаётгани, ортиқча буйруқбозлик ва қоғозбозликдан воз кечилгани, таълимга давлат сиёсати даражасида эътибор қаратилаётгани айни муддао бўлмоқда. 

Фарғона вилоятининг Қува туманидаги 49-умумтаълим мактаби инглиз тили фани ўқитувчиси Носиржон Давлатовни туманда кўпчилик танийди. Олий тоифали ўқитувчи йигирма йилдан буён мазкур мактабда ёш авлодга таълим-тарбия бериб келади. Ўқувчиларни хорижий тилни ўрганишга қизиқтиришда, илм-фан сирларидан воқиф қилишда ўзига хос мактаб ярата олган педагогнинг қалбида бир олам орзулар мужассам. Ҳар йили ўнлаб шогирдлари олий таълим муассасалари талабаси бўлаётганини фахрланиб сўзлайди. 

– Ўқитувчи учун шогирдининг ютуғидан ўтадиган мукофот йўқ. Ўзим ҳам университетга қабул қилинганимда устозим – Мусажон Охуновнинг ҳузурига чопганман, талаба бўлганимни суюнчилаб, дуосини олганман, – дейди Носиржон Давлатов. – Тўғрисини айтиш керак, бир вақтлар далама-дала юриб пахта терганмиз, ёппасига ободонлаштириш, қишлоқ хўжалиги ишларига жалб қилинганмиз. Буйруқбозлик, қоғозбозлик авжига чиққан эди. Дарс сифати, ўқувчи билими бир ёқда қолиб кетарди. Бугун соҳага эътибор бутунлай ўзгарди. Бунинг учун давлатимиз раҳбаридан, масъуллардан миннатдормиз. 

Айтиш керак, педагогларнинг нафақат жамиятдаги обрўси, балки меҳнатига тўланаётган ҳақ миқдори ҳам йил сайин ортиб бормоқда. Фақат астойдил изланиш, меҳнат ва салоҳият бўлса, кифоя. 

– Президентимиз ва ҳукуматимиз қарорларига асосан таълим ходимлари учун қатор имтиёз ва имкониятлар берилмоқда. Булардан оқилона фойдаланган ўқитувчилар сафи кенгайиб боряпти. Ўзимни мисол қилиб олсак, бир неча миллий сертификатлар ва TESOL халқаро сертификатига эгаман, бунинг учун ойлик маошимга қўшимча ҳақ берилади. Бундан ташқари, Мактабгача ва мактаб таълими вазирлиги жамғармасидан устама ҳам оламан, – дейди у. – Хуллас, бугунги кун ўқитувчиси фақат билим беришни, ўқувчиларга сифатли дарс ўтишни ўйлаши учун шарт-шароит яратилган. Мактаблар ҳам замонавий техникалар, компьютерлар билан тўлиқ таъминланяпти. 

<iframe width="650" height="420" src="https://www.youtube.com/embed/kTdTwW4ePIM" title="“Ўқитувчилик касбини танлаганимдан фахрланаман”" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Қайси юртда билимга, илм-фанга эътибор юксак бўлса, ўша мамлакат ҳар жиҳатдан бойиб бориши, дунёда ўз ўрни ва обрўсига эга бўлиши айни ҳақиқат. Фарзандларининг етук инсон бўлиб камол топиши, илм-маърифатли бўлишини юракдан истаган халқ эса ўқитувчи-мураббийларни бошига кўтараверади, эҳтиром ва эътибор кўрсатаверади. 

Суҳбатимиз якунида “Ўқитувчилик касбини танлаганимдан фахрланаман”, дея кўзлари чақнаб турган ўқувчилари томон ошиққан қаҳрамонимиз тимсолида юртимизнинг порлоқ келажагини кўргандек бўлдик... 

М.Сулаймонов, ЎзА мухбири.