Олий таълим олиш учун имкониятлар шунчалик кенгайтирилдики, билими бор ёшлар мамлакатимизда ёки дунёнинг исталган мамлакатидаги университет, институтларда ўқиши мумкин.

Лекин айрим одамларимиз фарзандини ўқишга киритиш учун ҳамон таниш-билиш қидиради. Бу билан ишни пора билан осонгина битирсам, дейди. Лекин порани олиб, чўнтакка урган, абитуриентнинг ўқишга ўзи кириб кетишини кутиб юрган “уддабуронлар” ҳақида кўп эшитганмиз. 

Аслида шу порага берилган маблағдан бир қисми боланинг билимини оширишга сарфланса, ўқишга кириш қийин эмас. 

Лекин “ўқишга киритаман”, “ўқишни кўчириб бераман” деб ваъда берувчилар чангалига илинадиган ҳамон учраб турибди.   

Фуқаро С.Х. ўзгалар мулкини фирибгарлик йўли билан қўлга киритишни кўзлаб, фуқаро М.нинг Ўш технология университетидаги ўқишини 1,4 минг АҚШ доллари эвазига Самарқанд давлат университетига кўчириб беришни ваъда қилган.  

Яна икки нафар фуқаронинг ҳар бирига 800 АҚШ долларидан ҳисоблаб, 1,6 минг АҚШ доллари эвазига Чимкент шаҳридаги Мухтор Авезов номидаги институтга 2-курсдан ўқишга киритиб қўйишни ваъда қилиб, жами 3 000 АҚШ доллари сўраган.  

С.Х сўраган пулларини олган вақтда эса Бош прокуратура ҳузуридаги Департамент ҳамда ДХХнинг Нарпай тумани бўлимлари томонидан ўтказилган тезкор тадбирда ашёвий далиллар билан ушланган. 

Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда. 

ЎзА