Украина Президенти Владимир Зеленский жума куни АҚШ Президенти Дональд Трамп билан Оқ уйда учрашади. Суҳбат чоғида Киевга Россия ҳудудига чуқур зарба бера оладиган “Tomahawk” ракеталари етказиб берилиши масаласи муҳокама қилиниши кутиляпти.

Украина раҳбари АҚШдан 2 500 километргача учиш имконига эга қурол сўраяпти. Трамп эса бу ҳақда “ҳали қарор қабул қилинмагани, эҳтимол “Америка захираси етарли эмас”лигини билдирган.

Зеленский шу йилнинг ўзида АҚШга учинчи ташрифини амлалга оширяпти. Унинг таъкидлашича, Москва “Tomahawk” ракеталари ҳақида эшитиши биланоқ мулоқотни қайта тиклашга урина бошлади.

Мазкур учрашув Трампнинг Россия Президенти Владимир Путин билан телефон орқали мулоқотидан кейин бўлиб ўтмоқда. Трамп сўнгги телефон суҳбати “жуда самарали” ўтганини таъкидлади. Икки томон олий даражада келаси ҳафта Венгрияда музокара ўтказиши, яқин икки ҳафта ичида Путин билан шахсан кўришишини айтди.

Шунингдек, Трамп ижтимоий тармоқдаги саҳифасида Путин билан урушдан кейинги АҚШ – Россия савдо алоқалари муҳокама қилинганини ёзди. Қолаверса, икки мамлакатнинг олий даражали маслаҳатчилари ҳам келаси ҳафта мулоқотни давом эттириши кутиляпти.

Ҳозир Будапештда ўтиши кутилаётган Путин – Трамп учрашуви халқаро жамоатчилик эътиборида. Бош вазир Виктор Орбан бу воқеани “тинчликсевар халқлар учун яхши хабар” деб атади ва Европа Иттифоқини “уруш тарафдори” сифатида танқид қилди.

Шу орада Россия Украина ҳудудига йил бошидан буён энг йирик, дея баҳоланаётган ҳаво ҳужумларидан бирини амалга оширди. Киев маълумотига кўра, Москва бир кечада 28 баллистик ракета, 320 дрондан фойдаланган. Украина элчиси Ольга Стефанишина бу амалиётни “Москва тинчлик ҳақида гапириб, амалда террор сиёсатини юритмоқда” дея изоҳлади.

Трамп август ойидаги Аляска саммити натижа бермагач, Путинга нисбатан кескинроқ позицияни танлаган эди. Қолаверса, унинг сентябрдаги “Украина бутун ҳудудини қайтариб олиши мумкин” мазмунидаги баёноти ҳам кутилмаганда янгради.

Дилшод Ҳакимов, ЎзА