Оқ уй ноябрь ойида Калифорнияда АҚШ Президенти Жо Байденнинг Хитой етакчиси Си Цзиньпин билан учрашувини уюштиришга киришди. Бу ҳақда “The Washington Post” нашри ўз манбаларига таяниб хабар берди.

Қайд этилишича, америкалик сиёсатчилар АҚШ ва ХХР етакчиларининг эҳтимолий бевосита мулоқотини “режалаш жараёнини бошлаб юборган”. Тадбир ноябрь ойида Сан-Францискода ўтиши мумкин.

Газетанинг бошқа манбаси таъкидлашича, Байден хитойлик ҳамкасби билан учрашиши мумкинлигини билдириб, “бу ҳақда ҳали ҳеч қандай тасдиқ йўқ”лигини қўшимча қилган.

Кейинги ой Сан-Францискода Осиё-Тинч океани иқтисодий ҳамкорлиги саммити бўлиб ўтади. Айнан ушбу анжуман доирасида Байден ва Цзиньпин учрашуви ташкил этилиши мумкинлигига урғу бериляпти.