Бу борада қилинаётган ишлар ҳақида “Ўзстандарт” агентлиги тизимидаги Ўзбекистон илмий-синов ва сифат назорати маркази директори Оқилбек Мустафоев шундай деди:

“Бу жараёнларда биз ҳам фаол бўлишга ҳаракат қилмоқдамиз. Маҳсулотларни экспорт қилишга кўмаклашиш бюроси карантин даврида экспортёр корхоналарга амалий кўмак бермоқда. Жорий йилнинг 24 мартидан бугунги кунга қадар 243 та озиқ-овқат ва қишлоқ хўжалиги маҳсулотларини ишлаб чиқарувчи ва экспорт қилувчи, 135 та енгил саноат корхонасининг стандартлаштириш, сертификатлаштириш, метрология, техник жиҳатдан тартибга солиш соҳасидаги муаммолари ўрганилди.

Уларга халқаро стандартларни жорий этиш ва сертификатлаштириш ишлари тўғрисида телефон ва электрон почта орқали масофадан туриб батафсил тушунтиришлар берилди.

Ўрганишлар натижасида Тошкент вилояти Ангрен шаҳрида фаолият юритаётган “TOP OIL” қўшма корхонаси ишлаб чиқарадиган ва экспорт қилишга режалаштирган ёғ миқдори 20 фоизни ташкил қилган маргарин маҳсулотига ГОСТ 32188-2013 давлатлараро стандарти амалиётга киритиб берилди.

Айни вақтда дунёдаги мураккаб вазиятни инобатга олган ҳолда, тадбиркорларга ишлаб чиқаришда фойланиётган ўлчов асбобларини қиёслов муддатини, муддати тугаган сертификатларини, акредитация гувоҳномаларини амал қилиш муддатлари 6 ой ёки жорий йилнинг охиригача узайтирилди”.