Бухоро вилояти адлия бошқармаси томонидан Facebook ижтимоий тармоғи орқали аҳоли ва тадбиркорлик субъектларини қизиқтирадиган долзарб мавзуларда онлайн мулоқотлар ўтказиб келинмоқда.
Ана шундай онлайн мулоқотнинг навбатдагиси тадбиркорлик фаолияти эркинликлари ва кафолатлари ҳамда мамкалакатимизда тадбиркорлик муҳитини янада яхшилашга қаратилган ислоҳотларга бағишланди.
Мурожаатларни ижобий ҳал қилиш, зарур ҳуқуқий маслаҳат ва ёрдамларни кўрсатиш учун мутасадди ташкилотлар вакиллари ҳам жалб қилинди. Онлайн мулоқотда дастлаб соҳага оид қонунчиликдаги сўнгги янгиликлар ва жорий этилган имтиёзлар тўғрисида маълумот берилди.
– Сўнгги беш йилда бу соҳани ривожлантиришга қаратилган 2 мингдан ортиқ қонун, фармон ва қарорлар қабул қилинди, – дейди вилоят адлия бошқармаси бошлиғи биринчи ўринбосари Шерзод Баҳронов. –Уларга асосан, 110 дан ортиқ лицензия ва рухсатнома бекор қилинди. 30 дан ортиқ фаолият тури хабардор қилиш тартибига ўтказилди. Рухсатномаларни расмийлаштириш тартиблари соддалаштирилиб, муддатлари ўртача 2 бараварга қисқартирилди. Хусусан, ўтган бир йил давомида бизнес муҳитини яхшилаш ва тадбиркорликни қўллаб-қувватлашга қаратилган биргина Ўзбекистон Республикаси Президентининг 70 дан ортиқ фармон ва қарорлари қабул қилинган.
Онлайн мулоқот давомида фуқаролардан келиб тушган саволларга қонунчилик асосида тушунтиришлар берилди.
– Метал буюмлар ишлаб чиқариш фаолияти билан шуғулланишим, тадбиркорлик фаолиятини кенгайтириш учун ер олиш тартиби қандай эканлиги тўғрисида тушунтириш беришни сўрагандим, – дейди фуқаро Х.Саъдуллаев. – Масала юзасидан менга қонунчилик юзасидан маълумотлар берилди.
Фуқарога Ўзбекистон Республикаси Вазирлар Маҳкамасиннг 2022 йил 14 февралдаги 71-сонли қарори билан тасдиқланган “Тадбиркорлик ва шаҳарсозлик фаолиятини амалга ошириш учун ер участкаларини мулк ҳуқуқи ва ижара ҳуқуқи асосида электрон онлайн-аукцион орқали бериш тартиби тўғрисида” ги Низом тадбиркорлик ва шаҳарсозлик фаолиятини амалга ошириш учун қишлоқ хўжалигига мўлжалланмаган бўш турган ер участкаларини мулк ва ижара ҳуқуқи асосида электрон онлайн-аукцион орқали реализация қилиш тартибини белгилаши, тадбиркорлик ва шаҳарсозлик фаолиятини амалга ошириш учун қишлоқ хўжалигига мўлжалланмаган бўш турган ер участкаларини мулк ва ижара ҳуқуқи асосида электрон онлайн-аукцион орқали олиши мумкинлиги билдирилди.
Шу билан бирга фуқаро О.Каримов четдан лимон олиб кириши, божхона тўловлари бекор қилинган деб эшитганлиги, бироқ божхона органлари бу имтиёз лимон импортига тегишли эмаслиги айтилаётганлиги, ушбу масалада тушунтириш беришни сўраган.
Ўзбекистон Республикаси Президентининг 2022 йил 31 майдаги ПФ–145-сонли “Истеъмол бозорларида нархлар барқарорлигини таъминлашга ва монополияга қарши чораларнинг таъсирчанлигини оширишга доир қўшимча чора-тадбирлар тўғрисида”ги фармонига кўра, 2022 йил 1 майдан 2023 йил 1 январгача бир қатор товарларни (жумладан, балиқ, янги ёки қуритилган цитрус мевалари (лимондан ташқари), маргарин ва бошқа) олиб киришда божхона божларининг ноль ставкалари белгиланлиги тўғрисида тушунтириш берилди.
Бу каби тадбирлар адлия бошқармаси томонидан мунтазам ўтказилади. Онлайн мулоқотнинг навбатдагиси “Давлат хизматлари кўрсатилиши: мурожаат, ечим ва таклиф” мавзусида бўлиб ўтади.
Зариф Комилов, ЎзА