Олий таълим муассасаларида спортни қадрият сифатида ривожлантириш, талабалар ўртасида соғлом турмуш тарзини кенг жорий этиш, уларда оммавий спорт турларига бўлган қизиқишни янада кучайтириш устувор вазифалардан бири саналади.

Олий таълим, фан ва инновациялар вазирлиги, Ёшлар сиёсати ва спорт вазирлиги, Ўзбекистон талабалар спорт ассоциацияси, спорт федерацияларининг “Талабалар лигаси” спорт мусобақаларини ташкил этиш ва ўтказиш бўйича қўшма қарори имзоланиб, ҳар йили тизимли тарзда ташкил этилишига келишилди.  

Шунингдек, “Оммавий футбол”, “Мактабларда футбол” ва “Талабалар лигаси” спорт мусобақаларини ташкил этиш ва ўтказиш тўғрисидаги яна бир қўшма қарор қабул қилиниб, қарорга кўра, олий таълим муассасалари талабалари ўртасида мини футбол бўйича “Талабалар лигаси” спорт мусобақалари 2023-2024 ўқув йилидан бошлаб мунтазам ўтказилиши белгиланди.

Бу ҳақда Ўзбекистон давлат жисмоний тарбия ва спорт университетида Олий таълим, фан ва инновациялар вазирлиги, Ёшлар сиёсати ва спорт вазирлиги ҳамда спорт федерациялари вакиллари иштирокида “Талабалар лигаси” спорт мусобақаларини юқори савияда ташкил этиш бўйича ўтказилган республика амалий семинарида айтиб ўтилди.  

Унда олий таълим муассасаларида жисмоний тарбия ва спорт кафедраларини ташкил этиш, мавжудларини замон талаблари асосида ривожлантириш, спорт клублари фаолиятини йўлга қўйиш, “Талабалар лигаси” спорт мусобақаларини юқори савияда ташкил этиш, олийгоҳлар ўртасида ҳамкорликни йўлга қўйиш каби долзарб масалаларга алоҳида эътибор қаратилди. Билдирилган фикр-мулоҳазалар, таклифлар асосида қарорлар қабул қилинди.

Семинар якунида “Баркамол авлод”, “Универсиада”, Талабалар лигаси”, “Талабалар спорт ўйинлари” ва “Спартакиада” каби оммавий спорт мусобақалари талабалар ўртасида нафақат соғлом турмуш тарзини татбиқ этиш, балки уларни бир жамоа бўлиб, ҳаракат қилишга ундовчи воситага айланиши таъкидланди.  

Т.Рўзиев, ЎзА