Жанубий Африка Республикаси (ЖАР) шифокори Унбен Пиллэй “омикрон” штамми билан хасталанган беморларда касаллик аломатлари қандай кузатилиши ҳақида сўзлаб берди.

Унинг гапларини Bloomberg агентлиги шундай келтиради: “ҳозирча касаллик “жуда енгил кўринишда” кечмоқда, бироқ бирор нарса дейишга ҳали эрта”.

"Беморларда грипп симптомлари бўлган, қуруқ йўтал,  иситма, тунда терлаш ва тананинг қақшаб оғришини кузатдик. Ўйлашимча, буларнинг барчаси  COVID-19 нинг биз кўрган бошқа тўлқинлари билан мос келади", - деди Пиллэй.

Бундан аввал  ЖАР тиббиёт ассоциацияси коронавируснинг “омикрон”  штамми билан касалланиш аломатлари ҳақида маълумот бериб, кучли чарчоқ асосий симптом эканини айтган эди. Шу билан бирга, беморларнинг бирортасида ҳам таъм ва ҳидни сезмаслик ҳолати кузатилмаган.

Ҳозирча ЖАРда ушбу штамм билан касалланганлар сони юз кишидан ошгани айтилмоқда. Шунингдек, “омикрон” штамми Гонконг, Исроил, Бельгия, Чехия, Германия, Буюк Британия, Италия, Австралия, Португалия, Шотландия, Нидерландия ва бошқа бир қатор мамлакатларда ҳам қайд этилди.