Ижтимоий тармоқларда “Шахсга нисбатан зўравонликнинг навбатдаги кўриниши божхоначилардан бўлгани тўғрисида шикоят келмоқда”, мазмунида хабар тарқалган.

Омбудсман ахборот хизматидан хабар беришларича, мазкур хабар Олий Мажлиснинг Инсон ҳуқуқлари бўйича вакили (Омбудсман) томонидан назоратга олинган ва ўрганилган.

Хабар ва унга илова қилинган шикоятларда гумонланувчи Э.Э. божхона хизмати ходимлари томонидан ушланиб, гиёҳвандлик моддаси бўйича сўроқ қилингани, танасининг турли жойларига электрошокер қўлланилгани ва калтакланганини қайд этган. Шунингдек, шикоятда ушбу ҳолат бўйича Тошкент вилояти божхона хизмати ходимларига нисбатан қонуний чора кўрилиши сўралган.

Бироқ, гумонланувчи томонидан у ушлаб турилган жой ҳақида маълумот берилмаган. Шу боис, Омбудсман ходимлари тезкорлик билан хабарда қайд этилган гумонланувчи Э.Э.нинг шахсига ва у ушлаб турилган жойга аниқлик киритди. Маълум бўлишича, гумонланувчи Э.Э. Тошкент вилоятидаги 1-сон Тергов ҳибсхонасида ушлаб турилган.

Ушбу хабар юзасидан Омбудсманнинг Тошкент вилоятидаги минтақавий вакили ҳибсхонага бориб, гумонланувчи Э.Э. билан холи тарзда суҳбатлашди. Ундан юқоридаги ҳолат юзасидан батафсил тушунтириш олинди ва шикоят қабул қилинди. 

Хабарда қайд этилган ҳолат ва гумонланувчи Э.Э.нинг Омбудсман номига ёзган шикояти Жиноят-процессуал кодексига мувофиқ, кўриб чиқиш учун Бош прокуратурага Омбудсман талабномаси билан киритилди.

Н.Абдураимова, ЎзА