Олий Мажлиснинг Инсон ҳуқуқлари бўйича вакили (Омбудсман)га бир гуруҳ фуқаролар иш ҳақлари пластик карточкага келиб тушиши билан ечиб олинаётганидан шикоят қилди.

Бу ҳолатга банк асоссиз равишда “кредитдан бўлган қарздорлиги учун” деган баҳонани рўкач қилиб келган.   

Мурожаатчиларнинг қайд этишича, улар “Агробанк” АТБ Арнасой филиали билан кредит шартномаси расмийлаштирган. Лекин, мазкур банк филиали бошқарувчиси ўринбосари С.А. уларга қўнғироқ қилиб, ойлик маошлари камлиги сабабли кредит маблағи берилмайдиган бўлганини оғзаки хабар қилган ва ўз мансаб мавқеидан фойдаланиб, бир қатор фуқаролар номига кредит расмийлаштирган. 

Мазкур ҳолат Омбудсманнинг Жиззах вилоятидаги минтақавий вакили томонидан ўрганилганда мурожаатчи А.И. номига жами 18,5 миллион сўм йиллик 26,99 фоиз устама ҳақ тўлаш шарти билан 4 йил муддатга кредит олингани аниқланди. 

Фуқаро ўзининг номига чиқарилган банк кредит картасини олишни рад этган. 

Шундай бўлса-да, ушбу карта маблағларини бошқарувчи ўз номига очилган банк пластик карталарига ўтказишга эришиб, кредит маблағларини ўз манфаатлари йўлида ўзлаштирган.

Жиноят ишлари бўйича Пахтакор тумани судининг ҳукмига кўра, С.А. Жиноят кодексининг бир қанча моддалари билан айбдор деб топилиб, банк соҳасида ҳамда бошқа ташкилотларда мансабдорлик ва моддий жавобгарлик лавозимларида ишлаш ҳуқуқидан маҳрум этилган ҳамда унга 7 йилга озодликдан маҳрум этиш жазоси тайинланган. 

Шунингдек, айбланувчи С.А.дан жами 145 миллион сўм миқдорида моддий зарар сифатида “Агробанк” АТБ Арнасой филиали фойдасига ундириш белгиланган.

Шундай бўлсада, мазкур банк филиали томонидан кредитни қоплаш учун мурожаатчилар номига “смс” талабномалар келиб, пластик карталарига тушган ойлик иш ҳақидан кредитларни қоплаш учун пул ундирилиши давом этган.

Ҳужжатлар ўрганилиб, Омбудсман томонидан судга меҳнат қонунчилигининг бузилгани ҳолати бўйича фуқаролар манфаатида даъво ариза киритилди.

Натижада Фуқаролик ишлари бўйича Дўстлик туманлараро судининг ҳал қилув қарори билан фуқаролар ва банк ўртасида тузилган кредит шартномалари бекор қилиниб, мурожаатчиларнинг бузилган ҳуқуқлари тикланди.

Н.Абдураимова, ЎзА