Олий Мажлиснинг Инсон ҳуқуқлари бўйича вакили (Омбудсман) Феруза Эшматованинг навбатдаги фуқаролар қабули бўлиб ўтди. Унда 15 нафарга яқин фуқаронинг мурожаатлари қабул қилинди ва назоратга олинди.

Мурожаатларда давлат идоралари мансабдор шахслари қабулига кириш, афв, прокуратура, суд-тергов масаласи, ишга жойлашиш, мулкий низолар, ижтимоий ёрдам, жумладан, бола пули олиш, уйни таъмирлаш, бошпанаси йўқларга уй ажратишда амалий ёрдам кўрсатиш каби масалалар кўтарилган.  

Айрим мурожаатлар жойига чиқиб ўрганиш ва тегишли чоралар кўриш учун Омбудсманнинг ҳудудлардаги минтақавий вакилларига юборилди. Қолган мурожаатлар бўйича тегишли давлат идоралари ва ташкилотларга фуқароларнинг бузилган ҳуқуқларини тиклаш бўйича Омбудсман мурожаати юборилди.  

Омбудсман ахборот хизмати фуқаролар тўғридан-тўғри Омбудсманнинг ҳудудлардаги минтақавий вакилларига ҳам мурожаат қилиши мумкинлигини маълум қилди. Уларнинг исм-шарифлари, вазифалари, қабул кунлари, манзили ва телефон рақамлари ҳақида ombudsman.uz сайти орқали маълумот олиш мумкин.

Н.Абдураимова, ЎзА