ФОТОРЕПОРТАЖ

Наманган вилояти Поп туманида 2023 йилда етиштирилган бошоқли дон ҳосилини нес-нобуд қилмасдан ўз вақтида уюшқоқлик билан йиғиб олиш ҳамда ғалладан бўшаган майдонларга такрорий экин экиш ишларини ташкил этиш бўйича вилоят кўргазмали семинари бўлиб ўтди.

Сирдарё ММТП ҳудудидаги “Фозилжон Муҳаммаджон” фермер хўжалиги ғалла майдонида ташкил этилган семинарда вилоят ҳокими Шавкат Абдураззоқов бошчилигида секторлар раҳбарлари, туманлар ҳокимлари, “Арт Софт кластер” МЧЖ, вилоят ва туман қишлоқ хўжалиги вакиллари, ММТП раислари, фермер хўжалиги раҳбарлари ҳамда ғалла ўримига бириктирилган отряд раҳбарлари иштирок этди.

[gallery-12216]

Семинар давомида мутасаддиларга ғалладан бўшаган ерларга такрорий экинларни кечиктирмасдан экиш, уларнинг парвариши бўйича тавсиялар берилди. Бунда ижтимоий муҳофазага муҳтож оилаларга ер бириктириб бериш алоҳида талаб қилиб қўйилди. Яъни, кам таъминланган, эҳтиёжманд ва ишсиз аҳоли хонадонлари, хусусан, “Темир дафтар”, “Аёллар дафтари” ва “Ёшлар дафтари”даги меҳнатга лаёқатли вақтинчалик ишсиз фуқароларга уруғлик буғдой, сомон пресс ва такрорий экин экиш учун ер майдони берилади. Ушбу экин майдонларида картошка, дуккакли ва мойли ҳамда чорва озуқа экинлари етиштирилади.

Тадбирда таъкидланганидек, жорий йил вилоят бўйича 67 минг 750 гектар майдонда ғалла парваришланган бўлиб, гектаридан ўртача 78,4 центнердан дон йиғиб олиниши режалаштирилган.

Ҳотам МАМАДАЛИЕВ(сурат),ЎзА