Жорий йилнинг 28 декабрь куни пойтахтимиздаги Киночилар уйида “Олтин Ҳумо” миллий мукофотини топшириш маросими ўтказилди.

Маросим жараёнида таниқли актёр ва номинация ғолибларидан интервью олдик.  

– “Олтин Ҳумо” миллий кинотақдимоти ҳақиқий маънода байрам, –деди Ўзбекистон халқ артисти Ражаб Адашев. – Негаки, унда киноижодкорларимиз меҳнати эътироф этилади. Албатта, бу тақдимотда кимдир совриндор бўлади ва яна кимларгадир ғолиблик насиб этмаса, хафа бўлмаслиги керак. Келаси йил, албатта олиши мумкин. Бунинг учун ҳаракат бор. Ўзбек киноси ривожланяпти. Очиғини айтиш керак, Янги йил байрами арафасида ушбу тақдимот ўтказилиши янада қувонарли. Фурсатдан фойдаланиб, Ўзбекистон халқини кириб келаётган 2023 йил билан чин қалбимдан табриклайман.  

Тадбирда “Энг яхши эркак роли” номинацияси ғолиблиги марҳум актёр Ҳошим Арслоновга насиб этди. “Олтин Ҳумо” махсус статуэткаси унинг ўғли Бобур Арслоновга топширилди.  

<iframe width="650" height="420" src="https://www.youtube.com/embed/NT42dkin7nE" title="“ОЛТИН ҲУМО" – КИНОИЖОДКОРЛАР УЧУН ЮКСАК ЭЪТИРОФ" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

– Ташкилотчиларга катта раҳмат. Бугунги кунда кино саноати ривожланмоқда. Ўзим шу кино соҳасида 30 йилдан буён ижод қиламан. Бугунги кунда соҳага катта эътибор қаратилмоқда. Шунинг учун Президентимизга ўз ташаккуримни билдираман. Насиб қилса отамнинг даражаларига ета олмасам ҳам ўз ўрнимга эга бўлишга интиламан. Машҳур актёр Ҳошим Арслоновга берилган миллий мукофот оиламизни қувонтирди, – деди Бобур Арслонов.  

Тақдимотда Ўзбекистонда хизмат кўрсатган санъат арбоби, таниқли режиссёр Зулфиқор Мусоқов “Энг яхши сценарий” ва “Энг яхши режиссёрлик иши” номинациялари бўйича мукофотланди.  

– Бундай эътирофдан бошимиз осмонга етди. Кутмаган эдик. Албатта, хурсандман. Бу танлов ҳакамларнинг овоз бериш натижаси дейиш мумкин. Агар, фильм одамларнинг дилида қолса, у арзиган бўлади. 2023 йилда ҳам режалар бисёр. Шу кунларда операторимиз Нью-Йорк шаҳрида “Осмондаги болалар-3” фильмининг охирги  кадрларини оляпти.  Режамиз бўйича Наврўз байрами арафасида томошабинлар эътиборига ҳавола этмоқчимиз, – деди З.Мусоқов.  

Насиба ЗИЁДУЛЛАЕВА, Дониёр ЁҚУБОВ (видео), ЎзА