Олий ва ўрта махсус таълим вазирлиги томонидан Жаҳон банкининг Халқаро ривожланиш ассоциацияси иштирокида “Олий таълимни модернизация қилиш” лойиҳаси амалга оширилмоқда. Шу муносабат билан вазирликда семинар-тренинг ташкил этилди.
Вазирлик томонидан лойиҳанинг олий таълим тизимида “Ички сифатни таъминлаш (Internal Quality Assurance)” йўналиши бўйича Shbeemann Consulting хорижий экспертлари билан биргаликда бир қанча чора-тадбирлар амалга оширилди.
Лойиҳа мақсадига мувофиқ, вазирлик томонидан тавсия этилган 10 та олий таълим муассасаси жалб этилган ҳолда Shbeemann Consulting хорижий экспертлари ОТМда “Ички сифатни таъминлаш (Internal Quality Assurance)” масаласига бағишлаган онлайн-тренингларнинг биринчи босқичи ўтказилди. Ушбу онлайн семинар-тренинглар 3 ой давомида ОТМда 8 та модулдан иборат бўлган “Ички сифатни таъминлаш (Internal Quality Assurance)” масаласига бағишланган мавзуларда ташкил этилди. Танлаб олинган 10 та ОТМ онлайн семинар-тренингларда 50 нафар профессор-ўқитувчи иштирок этди.
Онлайн семинар-тренинглар биринчи босқичининг якуний натижаларига кўра, 10 та ОТМдан қаторидан Shbeeman Consulting экспертлари томонидан 6 та ОТМ танлаб олинди. Танлаб олинган 6 та ОТМ учун келгусида олий таълим тизимидаги бошқа давлат ОТМда “Ички сифатни таъминлаш (Internal Quality Assurance)”ни таъминлаш тизимини татбиқ этиш учун мураббийлик (коучинг) қилиш мақсадида жорий йилнинг март ойидан бошлаб Shbeeman Consulting экспертлари томонидан онлайн семинар-тренингларнинг иккинчи босқичи ташкил этилди ва ҳозирда мазкур босқичнинг якуний қўшма тренинги бўлиб ўтмоқда. Мазкур семинар-тренингларнинг иккинчи босқичида иштирок этиш мақсадида танлаб олинган 6 та ОТМдан жами 35 нафар профессор-ўқитувчи иштирок этди.
Ушбу ўқув-семинарларда давлат олий таълим муассасаларида “Ички сифатни таъминлаш”нинг хорижий тажрибаларга асосланган ҳолда халқаро стандартларни жорий қилиш механизмларини ишлаб чиқиш, давлат олий таълим муассасаларида “Ички сифатни таъминлаш”ни босқичма-босқич тизимли ташкил этиш ва шу билан бирга, мазкур вазифаларни амалга оширишга амалий тайёргарлик кўриш мақсадида хорижий экспертлар билан биргаликда махсус чора-тадбирлар ва режалар ишлаб чиқиш билан боғлиқ амалий тадбирлар ўтказиш каби масалаларга алоҳида эътибор қаратилмоқда.
Лойиҳа доирасидаги ишлар самарадорлигини янада ошириш ва амалий семинарларни танланган 6 та ОТМда олиб бориш мақсадида Shbeeman Consulting эксперти Аким Эмурли Ўзбекистонга ташриф буюрди. Хорижий эксперт томонидан жорий ҳафта давомида танлаб олинган 6 та ОТМ жамоалари учун амалий семинарлар ўтказилди ва профессор-ўқитувчилар учун лойиҳа доирасида амалга оширилаётган ишлар бўйича тақдимотлар қилинди.
Файзулло Яҳёев, ЎзА