Бугун, 22 октябрь куни Чирчиқда оғир атлетика бўйича катталар ва ёшлар ўртасида бошланган Ўзбекистон кубоги мусобақаларида спорт иштиқбозлари Олимпия ва қитъа ўйинлари, жаҳон ва Осиё чемпионатларининг ғолиб ва совриндорлари Руслан Нурудинов, Рустам Жангабаев, Достон Ёқубов, Диёрбек Эрматов, Қурбонмурод Номозов каби номдор полвонлар беллашувларига гувоҳ бўлади.

Мамлакатимизнинг барча ҳудудларидан 400 га яқин маҳоратли оғир атлетикачилар қатнашаётган мусобақанинг илк кунида ёшлар ўртасидаги беллашувларга старт берилди.

Ўғил болалар ўртасида 55 килограмм вазнда ўтган мусобақаларда юртимизнинг 30 га яқин спортчилари ғолиблик учун супага чиқишди.

Шиддатли кечган баҳслар натижасида самарқандлик Диёрбек Одилов (93+120) 213 килограмм тошни буйсиндирган ҳолда шоҳсупанинг энг юқорисидан жой олди. 2-ўрин ҳам самарқандлик спортчига насиб этди. Кумуш медални қўлга киритган Зикрилло Мамиржонов (87+115) 202 килограмм натижага эришган бўлса, 3-ўринни қўлга киритган қашқадарёлик Жавоҳир Сайфуллаев (88+112) 200 килограмм кўрсаткични қайд этди.

Оғир атлетика бўйича халқаро мусобақаларда юртимиз шарафини ҳимоя қиладиган Ўзбекистон терма жамоасига номзодларни саралаш мақсадида ташкил этилаётган мамлакат кубоги 29 октябрга қадар давом этади.

Т. Рўзиев, ЎзА