2028 йил АҚШнингЛос-Анджелес шаҳрида ўтадиган ёзги олимпия ўйинларида тарихий спорт турлари бўлган бокс, оғир атлетика ва замонавий беш курашнинг ўрнини янги йўналишлар эгаллаши мумкин.

Халқаро олимпия қўмитаси президенти Томас Бах шу ҳақда  сўз юритди. Унинг билдиришича, Токио-2020 ўйинларида илк мусобақалари ўтган скалолазание, серфинг ва скейтбординг Лос-Анджелес 2028 нинг асосий 28 спорт тури қаторидан жой олиши эҳтимолдан йироқ эмас.

Боиси, бокс, оғир атлетика ва замонавий беш кураш спорт турларининг халқаро спорт федерацияларидаги муаммолар белгиланган муддатларда ўз ечимини топмаса, Халқаро олимпия қўмитаси ушбу қарорга келади.

Лос-Анджелес 2028 ўйинлари дастурига скалолазание, серфинг ва скейтбордингнинг расман қўшилиш масаласи 2022 йилнинг 31 декабрида Хитойда ўтадиган қишки олимпия Халқаро олимпия қўмитасининг 139-сессиясида кўриб чиқилади.  

Халқаро олимпия қўмитаси томонидан тасдиқланган лимитга биноан 2028 йилги олимпия ўйинларида 28 та спорт туридан 10,5 минг нафар спортчи қатнашиши белгиланган.

Олимпия ўйинлари спорт турлари сафига янги учта турнинг қўшилиши сўзсиз қайсидир спорт турларининг “олимпия эшиклари” ортида қолишига ёки қайсидир спорт турларидаги йўналишларнинг қисқаришига олиб келиши бор ҳақиқат.

Шундай вазиятда замонавий беш кураш, бокс ва оғир атлетика спорт турларининг бошқарув органи бўлган UIPM, AIBA ва IWF Халқаро олимпия қўмитасининг тегишли комиссиялари, бўлимлари билан шаффоф ишлаш, муносабатларни яхшилаш орқали олимпиададаги ўрнини сақлаб қолишга эришиши талаб этилади. Аммо улар бундай вазифани қай даражада уддалашини вақт кўрсатади.

Лекин ҳозирда яна 7 йилдан кейин бўладиган ўйинларнинг спорт турлари масаласи муҳокама этилаётганлиги ва бунга келгуси йилнинг январидаги ХОҚнинг 139 сессиясида қисман ойдинлик киритилишини инобатга олсак, олимпия оиласидаги эриган “музлар” силжий бошлаганлигидан далолат бермоқда.

Халқаро олипия қўмитаси ахборотида келтирилишича, юз йил мобайнида олимпия ўйинларининг ажралмас қисми бўлиб келган учта спорт турининг халқаро спорт федерациялари ХОҚга ваъда берилиб, кўзда тутилган ислоҳотларни 2023 йилга қадар амалга оширмас экан, Лос-Анджелес олимпиадаси уларсиз ўтишига олиб келади. Бундан энг аввало, миллионлаб бокс, оғир атлетика, замонавий беш кураш ишқибозларигина азият чекади, холос...

Эслатиб ўтамиз, Халқаро олипия қўмитаси қарорига кўра, Лос-Анджелес 2028 ўйинларининг дастури 2024 йил тўлиқ якунланади.

Тўлқин Рўзиев,
ЎзА мухбири