Хитойнинг Хайкоу шаҳрида стол тенниси бўйича “ITTF ATTU Asian Cup Haikou-2026” мусобақаси давом этмоқда.

Осиё стол тенниси тақвимидаги 2026 йилнинг илк нуфузли мусобақасида 14 та давлат вакиллари қаторида иштирок этаётган Ўзбекистон терма жамоаси аъзоси Аружан Камолова мусобақанинг 3-гуруҳида Ҳонгконг, Хитой ва Хитой Тайпейи вакиллари билан баҳс олиб бормоқда.

Кеча ҳонгконглик Олимпия ўйинлари ва жаҳон чемпионати совриндори, 29 ёшли Хой Кем билан кечган баҳсда Аружан муносиб қаршилик кўрсатган бўлса-да, учрашувда 11/2, 11/3 ва 11/6 кўринишида имкониятни бой бериб қўйди.

Бугун, 5 февраль куни мусобақа дастурига биноан ҳамюртимиз А.Камолова навбатдаги турда "Париж-2024" Олимпия ўйинлари иштирокчиси, Хитой тайпейилик 24 ёшли Чиен Тунг-Чуанга қарши баҳс олиб борди.

Чиен Тунг-Чуан-Аружан Камолова иштирокидаги қизиқарли кечган баҳсда 11/6, 11/5, 10/12 ва 11/4 ҳисоблари қайд этилди.

Натижалардан ҳам кўриниб турибдики, ҳали 17 ёшга тўлмаган ёш стол теннисчимиз Камолова дунёнинг энг кучли кичик ракеткачиларидан бирига муносиб қаршилик кўрсатган. Ҳаттоки, 3-партияда ғалабага ҳам эришган.

Энди умидли теннисчимиз Аружан эртага, 6 февраль куни гуруҳнинг сўнгги ўйинида тўққиз карра жаҳон чемпиони хитойлик Чэнь Синтун қаршилигини енгишга ҳаракат қилади.

Эслатиб ўтамиз, ушбу турнир жорий йилнинг 30 март-5 апрель кунлари Макаода ўтадиган жаҳон чемпионатига йўлланмалар тақдим этиши билан аҳамиятли саналади.

Т.Рўзиев, ЎзА