Токиода бўлиб ўтаётган ёзги Олимпиада ташкилотчиларидан камида 15 кишида коронавирус аниқланган. «Казинформ» ахборот агентлигининг хабар беришича, бу ҳақда шанба куни Олимпиаданинг ташкилий қўмитаси маълум қилган.

Вирус юқтирганларнинг етти нафари олимпия ўйинлари ўтказиладиган объектлари ходимлари бўлиб чиқди. Яна икки нафар журналист ва мусобақаларни ўтказиш ишлари билан боғлиқ олти кишида ҳам вирус аниқланган.

Токиодаги Олимпия қишлоғида коронавирусга чалинган биринчи бемор хорижий мамлакатлар  терма жамоаларининг бирига тегишли шахс экани маълум қилинди. Ҳозиргача Японияга келган бир нечта мамлакат спортчиларида  коронавирус аниқланган. Масалан,  Исроил, Уганда ва Сербия атлетлари вирус юқтиргани маълум бўлди, шунингдек, Нигерия ва Россия жамоаларига хизмат кўрсатаётган ходимлар ушбу касаллик билан хасталанган.

Токио  Олимпиадаси режа бўйича 2020 йил 24 июлдан 9 августгача бўлиши керак эди. Коронавирус пандемияси сабабли у бир йилга кечиктирилди. Энди мусобақалар жорий йилнинг 23 июлидан 8 августигача бўлиб ўтади. Ташкилотчилар ўйинларни хорижий мухлисларсиз ўтказишга қарор қилишди. Япониянинг олтита префектурасидан келган, жумладан токиолик томошабинлар ҳам олимпиада тадбирларига қўйилмайди. Мусобақалар бошланишига олти кун қолди, лекин Токиода коронавирус тарқалиши  билан боғлиқ мураккаб вазият ҳамон сақланиб қолмоқда. Мамлакат пойтахтида вирус юқтириш бўйича  кунлик кўрсаткич   1000 кишидан ошмоқда.    Токиода вазият ёмонлашгани боис фавқулодда вазиятлар режими 12 июлдан бошлаб яна кучга кирди, у 22 августгача давом этади, дейилмоқда хабарда.