Орзиқиб кутилиб, миллионларнинг қалбига ифтихору изтиробларни, мағлублигу ғолиблик туйғуларини жойлаган олимпиада “кема лайнери”нинг байроғи кеча 2024 йилги мусобақа манзили Парижга етиб борди.

Хорижий ахборот воситалари хабарига кўра, Олимпиада байроғини Париж шаҳар мэри Анн Идальго тантанали равишда қабул қилиб, журналистларга берган интервьюсида олимпиада ўйинлари бошлангунга қадар шаҳар маъмурияти биносида ҳилпираб туришини таъкидлаган.

Маълумки, замонавий олимпия ўйинлари 1924 йили айнан Францияда ўтказилганди. Демак, тўрт йилликнинг энг нуфузли мусобақаси яна 100 йилдан сўнг ўз “уйига” қайтмоқда. Париж-2024да 32 та спорт тури бўйича баҳслар ўтказилади.

Эслатиб ўтамиз, Франциянинг Париж шаҳрида ўтказиладиган навбатдаги XXXIII ёзги олимпия ўйинлари 2024 йилнинг 26 июль – 11 август кунлари бўлиб ўтади.

Хўш, ХXXIII ёзги олимпия ўйинларида Ўзбекистон спорт жамоаси қандай кўринишда бўлади? Халқимизнинг чексиз ифтихорига сабаб бўлган, барчамизни Ватан шаъни йўлида жипслаштирган Токионинг 3 та олтин ва 2 та кумушининг “эгалари” – таэквондо, бокс, оғир атлетика, эркин кураш ва дзюдочиларимиз эканлигини эслаган ҳолда адолат кўзгусини барчага баравар тутмоқлик лозим. Шу маънода “панада” қолиб кетаётган оммавий ва ўйин спорт турлари Париж-2024 ўйинларида Ватан спортининг “юки”нинг бир палласини гарданига оладиган вақт аллақачон келган, назаримизда.

Бундай дейишимизнинг боиси, ўтган йиллар мобайнида футбол, волейбол, регби спорт турларини мамлакатимизда янада ривожлантириш, терма жамоалар захирасини иқтидорли спортчилар билан бойитиш мақсадида қабул қилинган ҳукумат қарорлари, дастурлари, концепцияларнинг туб замири ҳам айнан шунга қаратилган. Қолаверса, ушбу спорт турлари бўйича турли оммавий мусобақалар, селекцион турнирлар, ўқув машғулотлар, семинарларнинг пировард манзили – Париж олимпиадасида Ўзбекистон спортчиларининг оммавий ва ўйин спорт йўналишларда ҳам иштирокини таъминлашдир.

Ўзбекистон регби федерациясидан маълум қилишларича, жорий йилнинг 18-19 сентябрь кунлари Тошкентда регби бўйича 18 ёшгача бўлган қизлар ўртасида Осиё чемпионати ўтказилади. Мазкур нуфузли мусобақада Ҳиндистон, Таиланд, Қозоғистон, Қирғизистон, БАА давлатлари қатнашиши кутилмоқда. Мазкур нуфузли мусобақада ҳамда юртимизда ўтказилаётган республика миқёсидаги баҳсларда ўз иқтидорини намойиш қилган спортчилар асосида келгусида мамлакат терма жамоасини шакллантириш режалаштирилган. Ҳозирда аёллар регбиси бўйича қозоғистонлик тажрибали мураббий Анастасия Хромова маслаҳатчи мутахассис сифатида фаолият кўрсатмоқда. Ўтказилаётган турнирлар, машғулотларнинг асосий мақсади, албатта 2024 йилда ўтадиган Париж олимпиадасида ўзбек регбичиларининг иштирокига эришишдир.

Худди шунингдек, Ўзбекистон волейболчилари ҳам Париж йўлида ўзига хос изланишларни олиб бормоқда. Мамлакат волейбол федерацияси бош котиби Хусан Насруллаевнинг айтишича, кейинги 2 ойнинг бирон бир ҳафтаси бўлмадики, Ўзбекистоннинг қайсидир ҳудудида волейбол бўйича мусобақа ўтказилмаган бўлса. Бу саъй-ҳаракатларнинг барчаси Франция олимпиадасида волейбол бўйича Ўзбекистон терма жамоасининг қатнашишига зарур шароитларни яратиш.

ХXXIII ёзги олимпия ўйинларининг катта карвони аллақачон йўлга чиққан. “Эшиклар ёпилади, кейинги бекат Париж!”, дейилганига ҳам 3 кун бўлди. Ишонамизки, Ўзбекистон спортининг жонкуярлари, етук мутахассислари, менежерлари бу йўлда амалга оширилажак ишлар ва келгуси режаларни аллақачон белгилашган. Умидимиз, орзуларимиз армонга айланмаса, “ширин туш”имиз Рио-2016, бугун бошимизни сарбаланд этган Токио-2020 эртаклари билан овуниб қолмасак бўлгани.

Тўлқин РЎЗИЕВ, ЎзА