Жаҳон енгил атлетика ассоциацияси раҳбари Себастьян Коу Париж Олимпиадаси учун сотилаётган чипта қимматлигини таъкидлади.

2012 йил Лондон ўйинлари бош ташкилотчиси бўлган Коу ахборот агентликлари билан ўтказган видеоконференцияда мазкур масалага тўхталиб, бу ҳолат айниқса Олимпия ўйинларида иштирок этадиган спортчилар оиласи учун қийинчилик туғдиришидан хавотир билдирди.

– Енгил атлетика мусобақаси жараёнида “Париж-2024” ташкилий қўмитаси стадионларни тўлдириши лозим бўлган ҳолатда чипта қимматлиги ноқулайлик келтириб чиқаради, – деди у. – Вазиятдан чиқиш учун ҳозирдан зарур чора кўрилмоғи лозим.

Видеоконференция давомида енгил атлетика чиптасини 980 еврога сотиб олиш мумкин бўлган вазиятда бошқа спорт турлари учун чипта 90 еврога баҳоланаётгани таассуфли ҳол экани айтилган.

Эслатиб ўтамиз, “Париж-2024” Олимпия ўйинлари келгуси йил 26 июль-11 август кунлари бўлиб ўтади.

Т. Рўзиев, ЎзА