Шу кунларда Шоличилик илмий-тадқиқот институтининг бир гуруҳ олим ва мутахассисларидан иборат делегация аъзолари Вьетнамда хизмат сафарида бўлиб турибди.

Сафар давомида делегация аъзолари “Ўзбекистон – Вьетнам ўртасида шоличилик соҳасида икки томонлама ҳамкорликни ривожлантиришга қаратилган чора-тадбирлар режаси”да белгиланган вазифалар ижросини таъминлаш ҳамда Вьетнамнинг шоли зараркунандаларига қарши курашиш борасидаги илғор тажрибасини ўрганиш мақсадида Cuu Long Delta шоличилик илмий-тадқиқот институти фаолияти билан танишди.

Cuu Long Delta шоличилик илмий-тадқиқот институти 360 гектар майдонга эга бўлиб, шундан 30 гектарида уруғлик шолилар парваришланади. Генетика ва селекция ҳамда агротехника лабораторияларида юқори шўрланиш, иссиқлик ва бошқа стресс омилларга чидамли, юқори ҳосилли шоли навларини яратиш устувор йўналиш сифатида йўлга қўйилган. Сўнгги 40 йил давомида институтда 200 га яқин янги навлар яратилган бўлиб, ҳозирда 3000 дан ортиқ шоли коллекцияси мавжуд.

Агротехника лабораториясида эса замонавий технологиялар кенг жорий этилган. Хусусан, уруғликларни дрон ёрдамида экиш, минерал ўғитлар ва гербицидларни ҳам дрон орқали сепиш амалиёти йўлга қўйилган. Таъкидланишича, дронлар 40–50 дақиқа ичида 1 гектар майдонга тўлиқ ишлов бериш қувватига эга. Ўзбекистонлик мутахассислар мазкур илғор тажрибани ўз кўзлари билан кўриб, тажриба даласида олиб борилаётган илмий ишлар билан яқиндан танишди.

Гулноза Бобоева,

ЎзА